Raaghyn Creeney 3 - Yn Vible Casherick 1775 1819

CAB. III

¹ My vac, ny jarrood my leigh; agh lhig da dty chree freayll my annaghyn.

² Son lhiurid laghyn, as bea veayn, as shee, nee ad bishaghey ort.

³ Ny lhig da myghin, as firrinys treigeil oo: kiangle ad mysh dty wannal, scrieu ad er glaare dty chree.

⁴ Myr shen yiow foayr, as aigney-mie ayns shilley Jee as dooinney.

⁵ Cur dty hreishteil ayns y Chiarn lesh ooilley dty chree; as ny cur barrant er dty hushtey hene.

⁶ Ayns ooilley dty raaidyn gow rishyn, as nee eh leeideil dty chesmadyn.

⁷ Ny bee creeney ayns dty hooillyn hene: gow aggle roish y Chiarn, as scarr rish yn olk.

⁸ Bee eh slaynt gys dty challin, as smuir gys dty chraueyn.

⁹ Cur ooashley da’n Chiarn lesh dty chooid-seihlt, as lesh ny chied-vessyn jeh ooilley dty vishagh.

¹⁰ Myr shen bee dty hoaltyn lhieent lesh sonnys, as nee dty ghoaghyn-feeyney roie harrish lesh feeyn noa.

¹¹ My vac, ny jean uss beg y hoiaghey jeh smaght y Chiarn: as ny bee neu-hurransagh fo’n kerraghey echeysyn.

¹² Son quoi-erbee shynney lesh y Chiarn, t’eh dy smaghtaghey, eer myr ta ayr yn mac, ta e chree goaill boggey jeh.

¹³ S’maynrey’n dooinney ta cosney creenaght, as y dooinney ta geddyn tushtey.

¹⁴ Son ta’n cosney echey ny share na cosney argid, as y vondeish echey, na’n airh s’costal.

¹⁵ T’ee ny s’costal na rubieyn: as dy chooilley nhee oddys oo y yeearree, cha vel ad dy ve soylit r’ee.

¹⁶ Ta beaynid laghyn ayns y laue yesh eck, as ayns e laue chiare berchys as ooashley.

¹⁷ Ta ny raaidyn ecksh raaidyn eunyssagh, as ooilley ny kesmadyn eck shee.

¹⁸ T’ee yn billey dy vea dauesyn ta dy chosney ee, as s’maynrey ta dy chooilley unnane ta dy reayll ee.

¹⁹ Ta’n Chiarn liorish creenaght er hickyraghey yn thalloo; liorish tushtey t’eh er choamrey ny niaughyn.

²⁰ Liorish yn tushtey echeysyn ta ny diunidyn brishey magh, as ta ny bodjallyn shilley neose yn druight.

²¹ My vac, ny lhig ad ass dty hilley: freill yn ynrycan creenaght, as keeayll vie.

²² Myr shen bee ad bea gys dty annym, as aalid gys dty wannal.

²³ Eisht nee oo gimmeeaght ayns dty raad dy sauchey, as dty chass cha jean snapperal.

²⁴ Tra t’ou lhie sheese, cha bee oo ayns aggle: dy feer, nee oo lhie sheese, as bee dty chadley kiune.

²⁵ Ny gow aggle roish seaghyn doaltattym, ny roish traartys ny mee-chrauee, tra te cheet orroo.

²⁶ Son bee yn Chiarn dty varrantagh, as nee eh freayll dty chass veih’n ribbey.

²⁷ Ny jean thurn mie y lhiettal vouesyn, daue te cair, tra te ayns pooar dty laue dy yannoo eh.

²⁸ Ny abbyr rish dty naboo, Royd oo, as tar reesht, as mairagh ver-yms dhyt eh: tra te ayd liort.

²⁹ Ny jean olk y chiarail noi dty naboo, fakin dy vel eh cummal dy sauchey liort.

³⁰ Ny jean streeu rish dooinney gyn oyr, tra nagh vel eh er n’yannoo aggair dhyt.

³¹ Ny jean troo mysh y tranlaasagh, as ny jean reih veg jeh e raaidyn.

³² Son ta’n tranlaasagh dwoaiagh da’n Chiarn; agh ta’n graih follit echey marish deiney cairal.

³³ Ta mollaght y Chiarn ayns thie yn vee-chrauee: agh t’eh bannaghey ynnyd-vaghee yn vooinjer ynrick.

³⁴ Shickyr t’eh jannoo faghid er ny craidoilee: agh t’eh coyrt grayse da ny imlee.

³⁵ Yiow yn chloan chreeney gloyr ayns eiraght, agh bee nearey er ooashley ny ommydanyn.