Raaghyn Creeney 29 - Yn Vible Casherick 1775 1819

CAB. XXIX

¹ Eshyn ta dy mennick coyrlit, as creoghey e wannal, bee eh doaltattym er ny stroie, as shen fegooish couyr.

² Tra ta deiney cairal ayns pooar, ta’n theay goaill boggey: agh tra t’ad fo tranlaasagh, ta’n pobble dobberan.

³ Eshyn shynney lesh creenaght, t’eh jannoo boggey da e ayr: agh eh ta freayll sheshaght streebee, t’eh jummal e chooid.

⁴ Ta’n ree liorish briwnys [cairal] cummal seose y cheer; agh eh ta goaill sollaghey-laue, t’eh dy choyrt eh naardey.

⁵ Dooinney ta brynneraght rish e naboo, t’eh skeayley lieen son e chassyn.

⁶ Ayns mee-chairys drogh ghooinney ta ribbey: agh gowee yn dooinney mie arraneyn-moyllee dy gennal.

⁷ Ta’n dooinney cairal goaill seose cooish yn ymmyrchagh: agh s’mooar lesh y drogh ghooinney dy hoiggal eh.

⁸ Ta deiney boiragh cur yn ard-valley fo seaghyn: agh ta deiney creeney castey jymmoose.

⁹ My ta dooinney creeney dellal rish ommydan, edyr eh ve corree ny craid cha der eh fea dhyt.

¹⁰ Ta deiney folley as dwoaie oc er sleih ynrick: agh ta’n dooinney cairal shirrey foays e annym.

¹¹ Ta’n ommydan fockley magh ooilley e aigney: agh ta persoon creeney dy chummal sthie eh gys traa cooie.

¹² My ta fer-reill cur cleaysh da breagyn, bee ooilley e harvaantyn olk.

¹³ Ta’n ymmyrchagh as y tranlaasagh cheet dy cheilley: agh she’n Chiarn ta coyrt soilshey daue ny-neesht.

¹⁴ Yn ree ta dy firrinagh briwnys son ny boghtyn, bee yn stoyl-reeoil echeysyn er ny hickyraghey son dy bragh.

¹⁵ Ta’n slatt as oghsan dy choyrt creenaght: agh ta lhiannoo faagit da hene tayrn nearey er e voir.

¹⁶ Tra ta drogh-yantee bishaghey, ta drogh-yannoo goaill niart: agh hee sleih cairal yn lhieggey oc.

¹⁷ Smaghtee dty vac as bee fea ayd; bee eh eer gerjagh da dty annym.

¹⁸ Raad nagh vel goo Yee, ta’n pobble cherraghtyn: agh eh ta freayll yn leigh, s’maynrey t’eh.

¹⁹ Cha vel drogh harvaant dy ve smaghtit lesh focklyn: son ga dy vel eh toiggal oo, cha jean eh freggyrt.

²⁰ Vel oo cur-my-ner dooinney ta siyragh ayns e ghoan? ta caslys share jeh’n voal-hushtagh na jehsyn.

²¹ Eshyn ta dy keiyn troggal e harvaant veih e aegid, gowee eh er dy ve e vac ec y jerrey.

²² Ta dooinney fargagh bioghey anvea, as ta’n eulyssagh cur olk er y hoshiaght.

²³ Tayrnys e voyrn dooinney sheese dy injil; agh eiyrys ooashley orroosyn ta imlee ayns cree.

²⁴ Quoi-theihll ta sheshey rish maarliagh, t’eh noid da e annym hene: t’eh er bree e loo, as cha vel eh soilshaghey yn ynrickys.

²⁵ Ta aggle dooinney dy hayrn eh ayns ribbey: agh bee kemmyrk echeysyn ver e varrant er y Chiarn.

²⁶ Ta ymmodee shirrey foayr y fer-reill; agh ta briwnys dy chooilley ghooinney cheet veih’n Chiarn.

²⁷ Ta dwoaie ec y dooinney onneragh er mitchoor, as ta’n drogh-er noid dasyn ta ynrick ayns e raaidyn.