Raaghyn Creeney 27 - Yn Vible Casherick 1775 1819

CAB. XXVII

¹ Ny jean boggyssagh jeed hene mychione y laa mairagh; son cha vel fys ayd, cre ver y laa lesh mygeayrt.

² Lhig da dooinney elley oo y voylley, as cha nee dty veeal hene; joarree, as cha nee ny meillyn ayd hene.

³ Ta’n clagh trome, as ta’n genniagh errey doillee dy ymmyrkey: agh ta farg yn ommydan ny s’trimmey na ad ny-neesht.

⁴ Ta jymmoose red eulyssagh, as corree mee-reiltagh; agh quoi oddys shassoo roish troo?

⁵ Ta oghsan foshlit ny share na graih follit.

⁶ S’firrinagh ta smaght carrey; agh ta paagey noid molteyragh.

⁷ Ta’n annym lane jiooldey rish yn eer kere-volley; agh da’n accryssagh ta dy chooilley nhee sharroo, blaystal.

⁸ Myr eean treigeil yn edd eck, shen myr ta’n dooinney ta rouail veih e ynnyd hene.

⁹ Ta ooil spiceit, as soar millish, ooraghey yn chree: myr shen ta dooinney er ny gherjaghey liorish coyrle dooie e charrey.

¹⁰ Dty charrey hene, as carrey dty ayr ny jean treigeil: as ny treisht gys thie dty vraarey son kemmyrk, ayns laa dty heaghyn: son ny share ta’n naboo ta liort, na braar ta foddey voïd.

¹¹ My vac, bee uss creeney, as jean boggey da my chree, dy voddym eddin y choyrt dasyn, nee m’y oltooaney.

¹² Ta dooinney tastagh cronnaghey yn olk ro-laue, as keiltyn eh-hene: agh ta ny giare-cheeayllee roie gour nyn mullee, as geddyn assee.

¹³ Gow yn eaddagh echeysyn, ta goll raane roish joarree, as gow gioal jehsyn son drogh ven.

¹⁴ Eshyn ta dy brynneragh fockley-magh goo mie e charrey, fey-ny-laa, cha vel eh agh scammylt da.

¹⁵ Faarn kinjagh ayns laa dewil fliaghee, as ben anveagh, t’ad co-laik.

¹⁶ Eshyn cheillys ish, keillee eh yn gheay, as soar ooil er e laue yesh, ta dy vrah eh-hene.

¹⁷ Myr ta yiarn shleeu yiarn, myr shen ta dooinney gerjaghey eddin e ghooinney-mooinjer.

¹⁸ Eshyn ta jeidjagh mysh e villey-figgagh, yiow eh soogh e vessyn: myr shen eshyn ta ayns ammys e vainshtyr, ta leagh mie ny chour.

¹⁹ Myr ayns ushtey, ta eddin casley rish eddin, myr shen ta cree dooinney gys dooinney.

²⁰ Cha vel yn oaie ny’n baase dy bragh lane: myr shen cha vel sayntyn sooilley dy bragh jeant magh.

²¹ Myr ta’n pot-lheïee son argid, as y furnace son airh, myr shen ta dooinney er ny phrowal liorish y veeal brynneragh.

²² Ga dy jinnagh oo ommydan y vroo ayns mortar, mastey curnaght, lesh pestyl, foast cha jean eh scarrey rish e ommijys.

²³ Bee imneagh dy hoiggal stayd dty hioltaneyn, as freill sooill vie er dty hellooyn:

²⁴ Son cha vel berchys son dy bragh: as vel yn attey reeoil goll veih sheeloghe gys sheeloghe?

²⁵ Son mannagh vel y traagh cheet rish, as y faiyr meein cheet er-ash, as glassyraght ny sleityn chymsit,

²⁶ Bee ny eayin ta son dty choamrey caillit, as farvaalys aber dty ghoair.

²⁷ As bee dty haie bainney goair ayd son dty vee, dy yannoo magh dty lught-thie, as son beaghey dty inneenyn.