Raaghyn Creeney 25 - Yn Vible Casherick 1775 1819

CAB. XXV

¹ T’ad shoh myrgeddin raaghyn creeney Solomon, ren deiney Hezekiah ree Yudah y scrieu.

² She gloyr Yee eh dy ve erskyn roshtyn dooinney: agh te onnor da reeaghyn dy ronsaghey magh cooishyn.

³ Ta’n aer son yrjid, as y thalloo son diunid, as cree reeaghyn doillee dy ve cronnit.

⁴ Scarr yn dross veih’n argid, as bee saagh aalin er ny chummey son y ghlenneyder.

⁵ Scugh ny mee-chrauee veih fenish y ree, as bee e stoyl-reeoil er ny niartaghey ayns cairys.

⁶ Ny jean boggyssagh jeed hene kiongoyrt rish y ree, as ny gow seose ynnyd deiney ooasle.

⁷ Son te ny share, dy jir ad rhyt, Tar seose; na dy beagh oo currit sheese fenish y phrince, ta dty hooillyn er vakin.

⁸ Ny gow magh dy siyragh gys streeu, er-aggle nagh bee fys ayd cre dy yannoo, my vees eh harrish, tra ta dty naboo er dty choyrt gys nearey.

⁹ Jean dty chooish y phleadeil rish dty naboo hene; as ny insh da fer elley shen ny ta eddyr shiu:

¹⁰ Er-aggle, dy der eshyn chlinnys eh nearey ort, as dy bee drogh ghoo ayd liorish.

¹¹ Fockle ta loayrit dy cooie, te goll-rish ooylyn airhey ayns baskadyn argid.

¹² Myr cliegeen airhey, as jewel soit ayns airh ghlen, myr shen ta coyrleyder creeney gys y chleaysh beasagh.

¹³ Myr feayraght sniaghtee ayns chiass yn ouyr, myr shen ta chaghter treishteilagh dauesyn ta dy choyrt eh; son t’eh dy ooraghey annym e vainshteryn.

¹⁴ Eshyn ta dy foalsey boggyssagh jeh’n feoiltys echey hene, t’eh goll-rish bodjallyn as geay gyn fliaghey.

¹⁵ Liorish meenid ta prince er ny veiyghey, as ta chengey veeley brishey eer craueyn.

¹⁶ Vel oo er gheddyn mill? ee wheesh as ta mie dhyt; er-aggle, my ee-ys oo rouyr jeh, dy dilg oo eh.

¹⁷ Freill dty chass veih thie dty naboo: er-aggle dy bee eh skee jeed, as cur feoh dhyt.

¹⁸ Dooinney ta gymmyrkey feanish foalsey noi e naboo, t’eh ny oayrd, as cliwe, as side gyere.

¹⁹ Dy hreishteil ayns dooinney neu-firrinagh ayns earish dy heaghyn, te myr feeackle brisht, as cass ass ynnyd.

²⁰ Myr eshyn ta goaill ersooyl garmad ayns emshyr feayr, as myr vinegar er nitre; myr shen ta eshyn, ta goaill arraneyn gys cree trimshagh.

²¹ My vees dty noid accryssagh, cur arran da dy ee, as my t’eh paagh, cur da ushtey dy iu.

²² Son nee oo cruinnaghey smarageyn aile er e chione, as ver y Chiarn leagh dhyt.

²³ Ta’n gheay-twoaie cur lesh chiarrey; myr shen ta eddin fargagh cur ny host yn chengey chooyl-chassee.

²⁴ Te ny share dy vaghey ayns corneil erbee mullagh thie, na ’syn un thie marish ben veealeragh.

²⁵ Myr ushtey feayr da dooinney paagh; myr shen ta naight mie veih cheer foddey.

²⁶ Son dooinney cairagh dy huittym roish ny mee-chrauee, t’eh myr farrane ta seiyt, as chibbyr brisht.

²⁷ Cha vel eh follan dy ee rouyr mill; myr shen cha vel eh son goo dooinney, dy ve geiyrt dy gyere er e chione-ardys hene.

²⁸ Eshyn nagh vel echey reill harrish e spyrryd hene, t’eh myr ard-valley traartagh, as gyn voallaghyn.