Raaghyn Creeney 24 - Yn Vible Casherick 1775 1819

CAB. XXIV

¹ Ny jean troo mysh drogh gheiney, as ny shir dy ve mâroo.

² Son ta’n cree oc lhie ayns drogh-yannoo, as ta ny meillyn oc loayrt jeh molteyrys.

³ Liorish creenaght ta thie troggit, as lesh tushtey te er ny chummey;

⁴ As liorish keeayl bee ny shamyryn lhieent lesh dy chooilley chooid chostal as aalin.

⁵ Ta dooinney creeney pooaral, as ta dooinney toiggalagh bishaghey ayns niart.

⁶ Son lesh coyrle chreeney hed oo laue rish caggey: as ayns ymmodee fir-choyrlee ta sauchys.

⁷ Ta creenaght erskyn roshtyn ommydan; cha vel eh fosley e veeal ’sy whaiyl.

⁸ Eshyn ta baarail e cheeayl ayns jannoo olk, yiow eh shen yn goo dy ghooinney olkyssagh.

⁹ Ta peccah ayns smooinaghtyn ommijagh; as ta’n craidoilagh dwoaiagh mastey deiney.

¹⁰ My lhiggys oo dty chree voïd ayns laa dy heaghyn, s’beg ta dty niart.

¹¹ Ny bee uss liastey dy livrey adsyn ta deyrit dy baase, as adsyn ta faagit magh dy ve stroit:

¹² My jirrys oo, Cur-my-ner, cha row toiggal ain jeh: nagh vel eshyn ta ronsagh y chree, goaill baght jeed? as eh ta coadey dt’annym, nagh vel eh fakin shoh? as nagh jean eh cooilleeney dy chooilley ghooinney cordail rish e obbraghyn?

¹³ My vac, ee uss mill, son dy vel eh mie; as y kere-volley, ta millish gys dty vlass:

¹⁴ Myr shen vees yn fysseree dy chreenaght gys dty annym: tra t’ou er gheddyn eh, eisht bee leagh ayd, as cha bee dty yerkal er ny yiarey jeh.

¹⁵ Ny lhie cooyl-chlea, O ghooinney mee-chrauee, noi thie yn er-cairagh; as ny cur mow e ynnyd-vaghee.

¹⁶ Son ta’n dooinney cairagh tuittym ayns seaghyn shiaght keayrtyn, as t’eh girree reesht: agh nee drogh-sleih tuittym fo drogh haghyrtyn.

¹⁷ Ny jean boggyssagh, tra huittys dty noid; as ny lhig da dty chree gatt, tra nagh vel eh cheet lesh:

¹⁸ Er-aggle dy vaik y Chiarn eh, as dy gow eh olk rish, as dy jyndaa eh ort’s e chorree veihsyn.

¹⁹ Ny bee uss fargagh kyndagh rish drogh-sleih; as ny jean troo mysh ny mee-chrauee.

²⁰ Son cha vel leagh erbee cour y drogh ghooinney, as bee cainle ny mee-chrauee currit ass.

²¹ My vac, bee uss ayns aggle y Chiarn, as y ree: as ny bee veg ayd dy yannoo roosyn ta shirrey caghlaa.

²² Son nee ny seaghyn oc cheet orroo doaltattym, as quoi ec ta fys, cre cha leah hig y drogh-yerrey orroo ny-neesht!

²³ Ta ny reddyn shoh neesht bentyn dauesyn ta creeney. Cha vel eh mie dy yannoo soiaghey jeh persoonyn ayns briwnys.

²⁴ Eshyn jirrys rish y vee-chrauee, T’ou uss cairagh; ersyn hig mollaght y theay, dwoaiyssee ashoonyn eh.

²⁵ Agh bee boggey ocsyn yiow foill da, as hig bannaght foddey beayn orroosyn.

²⁶ Nee dy chooilley ghooinney paagey ny meillyn echeysyn, ta coyrt briwnys cairal.

²⁷ Fow aarloo dty obbyr mooie, as jean dty chiartaghyn er y vagher, as lurg shen trog dty hie.

²⁸ Ny bee feanish noi dty naboo jeh dty yoïn; as ny jean foalsaght lesh dty veillyn.

²⁹ Ny abbyr, Nee’m rishyn, myr t’eh er n’yannoo rhym’s: cooilleen-yms yn dooinney cordail rish e obbyr.

³⁰ Hie mee shaghey magher y litcher, as liorish garey-feeyney yn ommydan.

³¹ As cur-my-ner, ve ooilley er n’aase harrish lesh drineyn, as va’n slane eaghtyr echey coodit lesh undaagagh, as va’n voalley chloaie er duittym.

³² Eisht yeeagh mee, as smooinee mee er shoh dy dowin; honnick mee shoh, as hooar mee ynsagh.

³³ Foast tammylt beg dy chadley, tammylt son saveenys, tammylt son filley ny laueyn dy chadley:

³⁴ Myr shen hig dty voghtynid ort myr troailtagh; as dty ymmyrch myr roosteyr caggee.