Raaghyn Creeney 23 - Yn Vible Casherick 1775 1819

CAB. XXIII

¹ Tra t’ou soie ec y voayrd marish ard-ghooinney, smooinee dy imneagh cre ta kiongoyrt rhyt.

² As cur skynn gys dty scoarnagh, my t’ou dty ghooinney jollyssagh.

³ Ny bee miandagh er e yien mie, son te bee molteyragh.

⁴ Ny jean rouyr siyr dy ve berchagh: ny cur slane treisht gys dty chreenaght hene.

⁵ Jean oo dty hooillyn y hoiaghey er shen nagh vel farraghtyn? son ta berchys dy shickyr jannoo skianyn daue hene; t’ad getlagh ersooyl myr urley neealloo yn aer.

⁶ Ny ee jeh arran fer y drogh-hooill, as ny lhig dty aigney ve miandagh er e vee blaystal.

⁷ Son myr t’eh smooinaghtyn ayns e chree, shen myr t’eh: Ee as iu, jir eh rhyt, agh cha vel e chree lhiat.

⁸ Yn greme t’ou er n’ee, nee oo tilgey, as caillee oo dty ghlare aalin.

⁹ Ny loayr ayns clashtyn yn ommydan: son soie-ys eh beg jeh creenaght dty ocklyn.

¹⁰ Ny scugh yn chenn chagliagh; as ny brish stiagh er magheryn y chloan gyn ayr.

¹¹ Son ta’n fendeilagh oc niartal; gowee eh seose yn chooish oc dt’oï.

¹² Croym dty chree gys ynsagh, as dty chleayshyn gys ny goan dy chreenaght.

¹³ Ny freill smaght veih’n lhiannoo; son my chustys oo eh lesh y clatt, cha jean eh cherraghtyn.

¹⁴ Kerree oo eh lesh y clatt, as nee oo livrey e annym veih niurin.

¹⁵ My vac, my ta creenaght ayns dty chree, gowee my chree’s boggey, eer my chree hene.

¹⁶ Dy jarroo, bee my veeghyn gennal, tra ta dty veillyn loayrt reddyn jeeragh.

¹⁷ Ny lhig da dty chree troo mysh drogh-yantee: agh bee uss ayns aggle y Chiarn fey-yn-laa liauyr.

¹⁸ Son shickyrys ta laa cooilleeney jerrinagh ry-heet; as cha bee dty yerkal er ny yiarey jeh.

¹⁹ Eaisht, my vac, as gow keeayl, as reill dty chree ayns y raad.

²⁰ Ny jean taaghey marish iuderyn-feeyney, mastey eederyn-foalley jollyssagh.

²¹ Son hig y meshtyllagh, as y glutterey gys boghtynid; as bee’n cadlag coodit lesh frytlagyn.

²² Eaisht rish dty ayr ren dty gheddyn; as ny soie beg jeh dty voir, tra t’ee shenn.

²³ Kionnee yn irriney, as ny creck eh; myr-chaagh, creenaght, as ynsagh, as keeayl,

²⁴ Bee ayr mac crauee ayns ard-voggey jeh; as eh ta geddyn lhiannoo creeney, bee gerjagh echey jeh.

²⁵ Gowee dty ayr as dty voir boggey jeed, as bee oo gerjagh jeeish ren oo y ymmyrkey.

²⁶ My vac, cur dooys dty chree, as lhig da dty hooillyn cur tastey da my raaidyn.

²⁷ Son ta streebagh myr jeeig dowin, as yn oainjyr myr ribbey chion.

²⁸ T’ee myrgeddin soie cooyl-chlea myr son spooilley, as bishaghey drogh-yantee mastey deiney.

²⁹ Quoi ec ta seaghyn? quoi ec ta trimshey? quoi ec ta anvea? quoi ec ta beealeraght? quoi ec ta lhottyn gyn oyr? quoi ec ta jirgid sooillyn?

³⁰ Adsyn ta fuirriaght foddey ec y feeyn, adsyn ta geiyrt er feeyn lajer.

³¹ Ny jeeagh uss er y feeyn ayns e yirgid, tra te soilshean ’sy chappan, tra te troggal e vree dy cooie.

³² Ec y jerrey nee eh lhottey myr ard-nieu, as gaghey goll-rish adder.

³³ Bee dty hooillyn soit er drogh-vraane, as nee dty chree fockley magh camlaagys.

³⁴ Dy feer, bee oo myr fer ta baiht ayns grunt ny marrey, ny goll-rishyn ta ny chadley er cronnag lhuingey.

³⁵ T’ad er woalley mee, nee oo gra, as cha row mee guint; t’ad er my yeealley, as cha dennee mee eh: cuin nee’m doostey? shir-yms huggey reesht.