Raaghyn Creeney 22 - Yn Vible Casherick 1775 1819

CAB. XXII

¹ Ta goo mie dy ve er ny reih roish mooarane berchys: as kenjallys-ghraihagh roish argid as airh.

² Ta’n berchagh as y boght cheet dy cheilley: ta’n Chiarn yn Er-croo oc ooilley.

³ Ta dooinney tastagh cronnaghey yn olk ro-laue, as shaghney eh: agh ta ny mee-cheeayllee roie er nyn gione, as t’ad seaghnit.

⁴ Liorish injillid, as aggle y Chiarn ta cheet berchys, as ooashley, as bea.

⁵ Ta drineyn, as ribbaghyn ayns raad ny camlaagee: agh eshyn ta jeeaghyn dy mie gys e annym hene vees foddey voue.

⁶ Trog dty lhiannoo ’sy raad, lhisagh eh goaill: as tra t’eh shenn cha jean eh treigeil eh.

⁷ Ta’n berchagh reill harrish y voght, as ta’n yeeaseyder ayns ammys yn yeeaseydagh.

⁸ Eshyn ta cuirr mee-chairys, nee eh buinn fardalys: as bee soost e hranlaase er ny vrishey.

⁹ Er y thooill feoilt hig bannaght ny ghaa: son t’eh shirveish kuse jeh e arran er ny boghtyn.

¹⁰ Eiyr magh yn scammyltagh, as bee anvea ec kione: dy feer, streeu, as oltooan, nee ad scuirr.

¹¹ Eshyn by-haittin lesh glennid cree, son ynrickys e veillyn bee yn ree ny charrey da.

¹² Ta sooillyn y Chiarn coadey deiney creeney, as t’eh tilgey goan y tranlaasagh bun-ry-skyn.

¹³ Ta’n litcher gra, Ta lion shooyl mooie, bee’m er my varroo ayns ny straïdyn.

¹⁴ Ta beeal drogh ven ooig dowin: nee eshyn ta feohdagh da’n Chiarn tuittym ayn.

¹⁵ Ta ommijys fraueit ayns cree paitchey: agh nee yn slatt smaghtee geiyrt magh eh.

¹⁶ Eshyn ta jannoo tranlaase er y voght, dy vishaghey e chooid-seihlt, as eh ta slaa laue yn verchagh, hig eh-hene dy feer gys feme.

¹⁷ Croym dty chleaysh, as eaisht rish goan deiney creeney, as chyndaa dty chree gys my ynsagh.

¹⁸ Son s’eunyssagh vees eh dhyt, dy reayll ad mayrt, as dy bee ad cormit jesh gys dty veillyn.

¹⁹ Dy vod dty varrant ve er y Chiarn, ta mee er hoilshaghey ad dhyt jiu, dy feer dhyt hene.

²⁰ Nagh vel mish er scrieu er dty hon’s ynsaghyn ooasle, ayns coyrleyn as tushtey?

²¹ Dy chur dhyt toiggal shickyr ayns goan ny firriney; dy choyrt coyrle fondagh dauesyn shirrys hood.

²² Ny jean spooilley yn boght, son dy vel eh boght: chamoo jean tranlaase er yn ymmyrchagh ayns briwnys.

²³ Son nee’n Chiarn y chooish oc y ghoaill seose, as spooillee eh yn annym ocsyn ren adsyn y spooilley.

²⁴ Ny jean caardys rish dooinney fargagh, as ny jean sheshaght rish fer anveagh.

²⁵ Er-aggle dy n’ynsee oo ny aghtyn echey, as dy dayrn oo ribbey er dty annym.

²⁶ Ny bee uss fer jeusyn ta coyrt fo nyn laue, ny jeusyn ta goll raane son feeaghyn.

²⁷ Mannagh vel fort ayd dy eeck, cre te eisht, agh dy gow eh voïd dty lhiabbee ta foyd?

²⁸ Ny jean scughey yn chenn chagliagh, ta dty ayraghyn er hoiaghey.

²⁹ Vel oo fakin dooinney jeidjagh ayns e obbyr? nee eh shassoo fenish reeaghyn, cha jean eh shirveish deiney donney.