Raaghyn Creeney 21 - Yn Vible Casherick 1775 1819

CAB. XXI

¹ Ta cree y ree ayns laue y Chiarn, myr ny strooanyn ushtey: t’eh dy hyndaa ad raad saillish hene.

² Ta raaidyn dooinney ooilley jeeragh ayns e hooillyn hene: agh ta’n Chiarn ronsaghey ny creeaghyn.

³ Dy yannoo cairys as briwnys kiart, te ny s’taitnyssagh da’n Chiarn na ourallyn costal.

⁴ Ayns shilley ard, as cree moyrnagh, as eer ayns farrysthie ny mee-chrauee, ta peccah.

⁵ Ta kiarail y dooinney jeidjagh leeideil gys sonnys: agh ta’n fer siyragh roie gour e vullee gys boghtynid.

⁶ Lesh chengey vreagagh dy chosney berchys, te fardalys leaystey noon as noal mâroosyn ta geiyrt er toyrt-mow.

⁷ Nee roosteyrys ny mee-chrauee stroie ad-hene: er-yn-oyr dy vel ad gobbal dy yannoo cairys.

⁸ Ta raad y pheccagh camlaagagh as quaagh: agh er son yn er ynrick ta’n obbyr echey jeeragh.

⁹ Te ny share dy chummal ayns corneil erbee mullagh thie, na marish ben veealeragh ayns thie mooar.

¹⁰ Ta annym drogh ghooinney aggindagh er olk: cha vow e naboo foayr erbee ayns e hilley.

¹¹ Tra ta’n craidoilagh kerrit, ta’n aegid gaase creeney: as tra ta’n toiggalagh ynsit, t’eh goaill tushtey.

¹² Ta’n dooinney cairal dy creeney goaill huggey hene stayd drogh-sleih; dy vel Jee coyrt naardey drogh-yantee son nyn ghrogh-yannoo.

¹³ Quoi-erbee dooinys e chleaysh noi eam yn ymmyrchagh, nee eshyn myrgeddin geamagh; agh cha vow eh clashtyn.

¹⁴ Ta gioot follit mooghey jymmoose, as leagh ’syn oghrish corree hrome.

¹⁵ Te boggey da dooinney cairal dy choyrt briwnys kiart: agh hig toyrt-mow er ny aggairee.

¹⁶ Eshyn ta er-shaghryn veih’n raad dy hushtey, bee e chronney marish ny merriu deyrit.

¹⁷ Eshyn ta geiyrt er gien mie, bee eh ny ghooinney boght: eshyn ta jollyssagh er feeyn as ooil, cha bee eh berchagh.

¹⁸ Bee ny mee-chrauee son feaysley da’n chloan ynrick, as y tranlaasagh son y dooinney jeeragh.

¹⁹ Te ny share dy chummal ’syn aasagh, na marish ben streeuagh as fargagh.

²⁰ Ta berchys ayn dy ve er ny yeearree, as ooil ayns cummal y dooinney creeney: agh ta’n ommydan dy yummal eh.

²¹ Eshyn eiyrys er cairys as myghin, yiow eh bea, ynrickys, as ooashley.

²² Ta dooinney schleioil cosney stiagh er ard-valley ny niartallee, as lhieggal troshid y treishteil oc.

²³ Quoi-erbee smaghtys e veeal, as e hengey, t’eh freayll e annym veih seaghyn.

²⁴ Craidoilagh moyrnagh as sonnaasagh ta’n ennym echeysyn, ta dy mooaralagh dellal ayns corree dewil.

²⁵ Ta mian y litcher dy choyrt eh naardey, son ta e laueyn chea obbyr.

²⁶ T’eh fo saynt jollyssagh fey-ny-laa: agh ta’n feoiltagh coyrt voish lesh laue foshlit.

²⁷ Ta oural ny mee-chrauee dwoaiagh: cre-woad smoo, tra t’eh dy hebbal eh lesh cree crauee-oalsey?

²⁸ Hed y feanish foalsey naardey: agh eh ta geill echey da’n irriney, t’eh loayrt dy shickyr.

²⁹ Ta’n drogh ghooinney staayney e eddin: agh son y dooinney onneragh, t’eh goll jeeragh er y raad.

³⁰ Cha vel creenaght, ny tushtey, ny coyrle, noi yn Chiarn.

³¹ Ta’n niagh greihit cour laa yn chaggey: agh ta sauchys veih’n Chiarn.