Raaghyn Creeney 20 - Yn Vible Casherick 1775 1819

CAB. XX

¹ Ta feeyn ny chialgeyr, jough lajer te eulyssagh: as quoi-erbee ta mollit lioroo, cha vel eh creeney.

² Ta jymmoose y ree myr garveigagh y lion: quoi-erbee vrasnys e chorree, t’eh noid da e vioys hene.

³ Te son goo mie dooinney dy chur streeu dy fea: agh bee dy chooilley pheeikear jannoo boirey.

⁴ Cha jean y litcher traaue kyndagh rish y feayraght; shen-y-fa shooylee eh ny thieyn ’syn ouyr, agh cha vow eh monney.

⁵ Ta coyrle ayns cree dooinney goll-rish ushtey dowin: agh nee dooinney schleioil tayrn magh eh.

⁶ Nee yn chooid smoo dy leih fockley-magh, dagh unnane, e vieys hene: agh dooinney dy firrinagh (mie) s’doillee y gheddyn.

⁷ Ta dooinney cairal shooyl ayns e ynrickys: ta e chloan bannit ny yeï.

⁸ Yn ree ta ny hoie er stoyl y vriwnys, t’eh skeayley ersooyl dy chooilley olk lesh e hooillyn.

⁹ Quoi oddys gra, Ta mee er ghlenney my chree, ta mee seyr veih my pheccah?

¹⁰ Ta caghlaa meihaghyn, as caghlaa towseyn, ny-neesht co-laik dwoaiagh da’n Chiarn.

¹¹ Eer lhiannoo, as oddys baght ve goit jeh, liorish e ymmyrkey, vel caslys mie ny sie jeh.

¹² Yn cleaysh ta clashtyn, as y sooill ta fakin, she’n Chiarn t’er chiaddey ad ny-neesht.

¹³ Ny cur rouyr raad da cadley er-aggle dy jig oo gys boghtynid: foshil dty hooillyn, as bee oo jeant magh lesh arran.

¹⁴ Cha by-feeu eh, cha by-feeu eh, ta’n kionneyder dy ghra: agh tra t’eh er n’immeeaght, eisht t’eh boggyssagh.

¹⁵ Ta airh ayn, as mooarane claghyn costal: agh ta ny meillyn lesh tushtey, roish ny jewellyn s’aalin.

¹⁶ Gow yn garmad echeysyn ta raane roish joarree, as gow gioal jehsyn, ta coyrt fo laue son ben whuaagh.

¹⁷ Ta arran dy volteyrys millish da dooinney, agh hig y traa, dy bee eh myr lane-beeal dy ghenniagh.

¹⁸ Ta dy chooilley chiarail, liorish coonceil, er ny niartaghey: as lesh coyrle vie gow laue rish caggey.

¹⁹ Eh ta goll mygeayrt myr skeealleyder, t’eh dy vrah folliaghtyn: er-y-fa shen, ny bee veg ayd dy yannoo rishyn, ta brynneraght lesh e veillyn.

²⁰ Quoi-erbee ghwee-ys mollaght da e ayr, ny e voir: bee’n lamp echeysyn er ny vooghey ayns y dooid dy ghorraghys.

²¹ Foddee eiraght ve cosnit ayns traa giare ec y toshiaght: agh gyn bannaght cheet lesh ec y jerrey.

²² Ny abbyr uss, Cooilleen-yms olk son olk: agh fark er y Chiarn, as nee eh dty livrey.

²³ Ta caghlaa meihaghyn dwoaiagh da’n Chiarn: as y towse foalsey cha vel eh mie.

²⁴ Ta kesmadyn dooinney fo reill y Chiarn, kys oddys dooinney eisht e raad hene y hoiggal?

²⁵ Te ribbey da’n dooinney ta spooilley cooid chasherick; as lurg breearraghyn, shirrey brishey ad.

²⁶ Ta ree creeney skeayley ny mee-chrauee, as tayrn y whueeyl harrystoo.

²⁷ Ta cooinsheanse dooinney hene cainle y Chiarn, ronsaghey magh eer folliaghtyn s’diuney yn chree.

²⁸ Ta myghin as firrinys coadey yn ree: as ta e stoyl-reeoil cummit seose liorish trocairys.

²⁹ Ta gloyr deiney aegey nyn niart, as ta’n kione lheeah aalid shenn gheiney.

³⁰ Ta smaght as buillaghyn lhiasaghey olk: myr shen ta seaghyn glenney broïd follit y chree.