Raaghyn Creeney 2 - Yn Vible Casherick 1775 1819

CAB. II

¹ My vac, my nee oo soiaghey jeh my ghoan, as my annaghyn y reayll dowin follit ayns dty chree;

² Myr shen dy jean oo croymmey dty chleaysh gys creenaght, as chyndaa dty chree gys tushtey;

³ Dy feer, my eïe-ys oo dy ard son keeayll, as my hroggys oo dty choraa son toiggal;

⁴ My shirrys oo ee myr argid, as ronsaghey er y hon eck, myr son berchys follit;

⁵ Eisht toiggee oo aggle y Chiarn, as yiow briaght jeh tushtey dty Yee.

⁶ Son ta’n Chiarn coyrt creenaght: ass y veeal echeysyn ta cheet fysseree as tushtey.

⁷ T’eh tashtey seose slane creenaght son y dooinney cairal: t’eh myr eilley-caggee dauesyn ta gimmeeaght dy jeeragh.

⁸ T’eh dy reayll ny kesmadyn dy vriwnys, as coadey raad e nooghyn.

⁹ Eisht nee oo toiggal cairys, as briwnys, as corrymid: dy jarroo dy chooilley raad mie.

¹⁰ Tra ta creenaght gentreil stiagh ayns dty chree, as ta tushtey eunyssagh gys dty annym.

¹¹ Nee coyrle chreeney oo y choadey, bee tushtey dty endeilagh.

¹² Dy livrey oo veih raad y drogh ghooinney, veih’n dooinney ta loayrt goan cluicagh.

¹³ Ta treigeil cassanyn yn ynrickys, dy huill ayns raaidyn y dorraghys.

¹⁴ Ta goaill boggey dy yannoo olk, as taitnys oc ayns camlaagys ny drogh-yantee.

¹⁵ Ta shooyl ayns raaidyn cammey, as t’ad condaagagh ayns nyn immeeaght.

¹⁶ Dy livrey oo veih’n ven yoarree, dy jarroo veih’n ven-oainjyr ta brynneraght lesh e goan.

¹⁷ Ta treigeil leeideilagh yn aegid eck, as jarrood yn conaant ren ee fenish Yee.

¹⁸ Son ta’n thie eck ayns naboonys y vaaish, as ny kesmadyn eck leeideil gys ny merriu.

¹⁹ Cha vel veg ta taaghey mâree chyndaa reesht, chamoo t’ad dy ghoaill ny cassanyn dy vea.

²⁰ Dy vod oo shooyl ayns raad deiney mie, as freayll kesmadyn y vooinjer chairal.

²¹ Son nee deiney ynrick cummal ’sy cheer, as nee feallagh ny firrinys tannaghtyn ayn.

²² Agh bee ny mee-chrauee giarit jeh veih’n thalloo, as bee ny drogh-yantee astyrit ass.