Raaghyn Creeney 19 - Yn Vible Casherick 1775 1819

CAB. XIX

¹ Ny share ta’n boght ta gimmeeaght ayns e ynrickys, na eh ta camlaagagh ayns e veillyn, as ny ommydan.

² Myrgeddin dy bee yn annym fegooish ynsagh cha vel eh mie: as eshyn ta ro hiyragh, nee eh tuittym ayns peccah.

³ Ta ommijys dooinney dy chassey e raad: as ta e chree tallagh noi yn Chiarn.

⁴ Ta berchys jannoo myrgeddin ymmodee caarjyn: agh veih yn voght, ta eer e naboo chyndaa ersooyl.

⁵ Cha bee feanish foalsey fegooish kerraghey, as ta smaght gyere cour y vreagerey.

⁶ Nee ymmodee shirrey foayr y ree, as ta dy chooilley ghooinney ny charrey dasyn chebbys giootyn.

⁷ Ta deiney-mooinjer y voght ooilley dy choyrt cooyl rish: cre-woad smoo ta e chaarjyn goll foddey veih? t’eh geiyrt orroo lesh e ghoan, agh cha vel geill oc da.

⁸ Eh ta geddyn creenaght, shynney lesh e annym hene: eshyn freillys tushtey yiow eh mie.

⁹ Cha bee feanish foalsey fegooish kerraghey, as nee yn breagerey dy shickyr cherraghtyn.

¹⁰ Cha vel pooar cooie son ommydan: foddey sloo son sharvaant dy reill harrish princeyn.

¹¹ Ta keeayl dooinney dy chastey e chorree: as te yn ghloyr echey [ny cheayrtyn] dy lhiggey lesh yn aggair.

¹² Ta jymmoose y ree myr garveigagh y lion: agh ta’n foayr echey myr druight er y faiyr.

¹³ Ta ommydan dy vac seaghyn e ayrey: as ta beealerey dy ven myr faarn kinjagh ayns thie.

¹⁴ Ta thieyn as berchys eiraght ayraghyn: as ta ben lowal veih’n Chiarn.

¹⁵ Ta litcheraght dy hilgey fer ayns cadley trome, as nee’n annym liastey surranse gortey.

¹⁶ Eshyn freillys ny annaghyn, t’eh freayll yn annym echey hene: agh hed eshyn mow, nagh vel geill echey gys e raaidyn.

¹⁷ Eshyn ta giastyllagh da ny boghtyn, t’eh geeasaght da’n Chiarn: as son shen t’eh myr shoh dy vaarail, bee eh er ny eeck da reesht.

¹⁸ Smaghtee dty vac, choud as ta caslys dy yannoo mie jeh, agh ny cur raad da dewilys neu-chooie.

¹⁹ Nee dooinney siyragh gys corree surranse seaghyn: son my livrey-ys oo eh, ny-yeih shegin dhyt jannoo eh reesht.

²⁰ Eaisht rish coyrle, as gow ynsagh, dy vod gerjagh ve ayd ayns jerrey dty laghyn.

²¹ Ta ymmodee smooinaghtyn dowin ayns cree dooinney: ny-yeih she coyrle y Chiarn, shen nee shassoo.

²² Te yeearree dooinney dy yannoo thurn mie: as ta’n boght ynrick ny share na’n berchagh breagagh.

²³ Ta aggle y Chiarn leeideil gys bea: s’maynrey vees e lheid, as shaghnee eh dagh olk.

²⁴ Ta’n litcher liastey follaghtyn e laue ayns e vroghil, as s’coan nee eh wheesh troggal eh gys e veeal.

²⁵ Smaghtee yn craidoilagh, as nee yn vooinjer ôney goaill tastey: as coyrlee dooinney toiggalagh, as gowee eh tushtey.

²⁶ Eshyn ta spooilley e ayr, as dy eiyrt ersooyl e voir, t’eh ny vac gyn-nearey as scammyltagh.

²⁷ Cur twoaie, my vac, nagh n’eaisht oo rish y drogh ynsagh shen, ver oo er-shaghryn voish coyrle vie.

²⁸ Cha vel feanish mee-chrauee agh jannoo craid jeh briwnys, as ta beeal y drogh-yantagh sluggey sheese mee-chairys.

²⁹ Ta kerraghey kiarit son ny craidoilee, as scuitchal son dreeym ny mee-cheeayllee.