Raaghyn Creeney 18 - Yn Vible Casherick 1775 1819

CAB. XVIII

¹ Ta dooinney, lurg e aigney, scarrey eh-hene [veih cooishyn elley] as shirrey magh, as dellal ayns dy chooilley chreenaght.

² Cha vel taitnys ec ommydan ayns tushtey, agh ayns geiyrt er aigney e chree hene.

³ Raad ta’n mee-chrauee cheet, ta faghid neesht cheet mârish, as oltooan lesh scammylt.

⁴ Ta goan beeal dooinney myr ushtaghyn dowin, as farrane dy chreenaght myr strooan bio.

⁵ Dy yannoo soiaghey jeh persoon ny mee-chrauee, cha vel shen mie, ny dy chastey yn dooinney cairal ayns briwnys.

⁶ Ta meillyn yn ommydan dellal ayns streeu, as e veeal doostey bwoailtys.

⁷ Ta beeal ommydan e hoyrt-mow, as ta e veillyn ribbey e annym.

⁸ Ta focklyn skeealleyder myr lhottyn, as ta’n ghah oc roshtyn eer gys y chree.

⁹ Eshyn neesht ta liastey ayns e obbyr, t’eh ny vraar da’n ard-stroialtagh.

¹⁰ Ta ennym y Chiarn toor lajer: ta’n dooinney cairagh chea huggey, as t’eh ayns sauchys.

¹¹ Ta cooid y dooinney berchagh e ard-valley lajer, as er-lesh hene myr voalley ard.

¹² Roish toyrt-mow ta cree dooinney mooaralagh, as ta injillid goll roish ooashley.

¹³ Eh ta coyrt ansoor ayns cooish, roish my t’eh clashtyn eh, te ommijys as nearey da.

¹⁴ Nee spyrryd dooinney gymmyrkey lesh fo annooinid e ghooghys: agh spyrryd guint quoi oddys y ymmyrkey?

¹⁵ Ta cree yn dooinney creeney cosney tushtey: as ta cleaysh y dooinney lowal shirrey son tushtey.

¹⁶ Ta gioot dooinney jannoo raad da, as cur lesh eh gys sheshaght deiney mooarey.

¹⁷ Eh ta loayrt hoshiaght ayns e chooish hene, er-lhiat dy vel eh ’sy chair: agh ta e naboo cheet, as dy rassey trooid eh.

¹⁸ Ta lottyn coyrt streeughyn gy-kione, as reaghey boiraghyn eddyr deiney niartal.

¹⁹ Ta braar, as corree er, ny s’doillee dy ve cosnit na ard-valley lajer: as ta mee-choardail braaraghyn myr boltyn cashtal.

²⁰ Bee jollys dooinney jeant magh lesh mess e veeal: as lesh bishagh e veillyn bee eh er ny ooraghey.

²¹ Ta baase as bioys ayns pooar y chengey, as nee dooinney farrail rere myr t’eh jannoo ymmyd jeh.

²² Quoi-erbee ta geddyn ben (vie) t’eh geddyn gioot mie, as cosney bannaght veih’n Chiarn.

²³ Ta’n boght guee as geearree: agh ta’n berchagh gansoor dy baggyrtagh.

²⁴ Eshyn ta caarjyn echey, shegin da jeeaghyn eh-hene myr carrey: as ta carrey ayn lhiannys hood ny s’chenney na braar erbee.