Raaghyn Creeney 17 - Yn Vible Casherick 1775 1819

CAB. XVII

¹ Ny share ta greme chirrym (dy arran) as fea lesh, na lane thie dy yien mie, lesh anvea.

² Nee sharvaant creeney reill harrish mac, ta oyr nearey: as yiow eh ayrn jeh’n eiraght mastey ny braaraghyn.

³ Myr ta’n coirrey-lheïe son glenney argid, as yn furnace son airh: shen myr ta’n Chiarn prowal ny creeaghyn.

⁴ Ta drogh-yantagh cur geill da meillyn foalsey; as breagerey coyrt cleaysh da drogh hengey.

⁵ Quoi-erbee chraidys mysh y voght, t’eh goltooan e Er-croo: as eh ta goaill boggey ayns seaghyn, cha bee eh gyn loght.

⁶ Ta cloan chlienney ooashley da shenn gheiney: as ta ayraghyn gloyr nyn gloan.

⁷ Cha vel goan creeney cooie da ommydan, foddey sloo ta meillyn breagagh lowal ayns prince.

⁸ Ta gioot myr jewel costal ayns ny sooillyn echeysyn ta goaill eh: te goaill raad ayns dy chooilley chooish.

⁹ Eshyn ta coodaghey foill, t’eh cosney aigney-mie: eshyn ta doostey’n chooish, t’eh jannoo brishey eddyr eer caarjyn.

¹⁰ Ta coyrle vie goaill greme share er dooinney creeney, na keead builley er yn ommydan.

¹¹ Ta drogh ghooinney soit ynrycan er anvea: shen-y-fa bee chaghter dewil currit magh n’oï.

¹² Lhig da muc-awin t’er choayl e quallianyn ve quaaltagh dooinney, roish ommydan ayns farg.

¹³ Quoi-erbee chooilleenys olk er son mie, nee’n olk lhiantyn gys e hie.

¹⁴ Ta toshiaght streeu myr lhiggey raad da thooilley: shen-y-fa lhig voïd anvea, my jed eh er y hoshiaght.

¹⁵ Eshyn ta seyrey ny oolee, as eh ta deyrey ny neu-chyndee, t’ad eer ny-neesht dwoaiagh da’n Chiarn.

¹⁶ Cre-woad share ta ommydan jeh e verchys, fakin nagh vel cree echey dy chosney creenaght lesh?

¹⁷ Ta carrey dooie ec dy chooilley hraa: agh t’eh myr dty vraar-ruggit ayns earish dty heaghyn.

¹⁸ Ta’n dooinney lhag-hushtagh coyrt e laue, as t’eh goll raane fenish e charrey.

¹⁹ Shynney leshyn anvea, ta goaill taitnys ayns streeu: as eshyn ta troggal ro ard e hie, t’eh tayrn assee er hene.

²⁰ Eshyn ta jeh cree roonagh, cha vow eh veg y vie, as ta’n chengey foalsey tuittym ayns olk.

²¹ Eshyn ta geddyn mac mee-cheeayllagh, t’eh gys e hrimshey: as s’beg y gherjagh t’ec ayr yn ommydan.

²² Ta cree gennal jannoo follan myr medshin: agh ta spyrryd brisht shirgaghey ny craueyn,

²³ Ta dooinney mee-chrauee goaill leagh dy follit, dy chassey raaidyn y vriwnys.

²⁴ Ta creenaght soilshean ayns eddin dooinney creeney: agh ta sooillyn ommydan rouail noon as noal er feaï-ny-cruinney.

²⁵ Ta mac neu-chreeney trimshey da e ayr, as sherriuid jeeish dymmyrk eh.

²⁶ Myrgeddin dy aagail magh yn ynrick, cha vel eh mie, ny dy oltooan princeyn son nyn gairys.

²⁷ Raad ta dooinney creeney ynsit, t’eh sparalagh jeh e ghoan: as ta dooinney tastagh jeh spyrryd smaghtit.

²⁸ Eer ommydan, tra t’eh ny host, t’eh coontit creeney: as eh ta dooney e veillyn, t’eh soit jeh myr dooinney toiggalagh.