Raaghyn Creeney 15 - Yn Vible Casherick 1775 1819

CAB. XV

¹ Ta ansoor meeley meeinaghey corree: agh ta goan fargagh doostey jymmoose.

² Ta chengey yn vooinjer chreeney cur tushtey er y hoshiaght: agh ta beeal ny mee-cheeayllee deayrtey magh ommijys.

³ Ta sooillyn y Chiarn ayns dy chooilley voayl, cur-my-ner chammah sie as mie.

⁴ Ta chengey gherjoilagh billey dy vea: agh ta lhag-smaght aynjee brishey yn spyrryd.

⁵ Ta’n ommydan soiaghey beg jeh ynsagh e ayrey: agh eh ta beasagh gys oghsan, t’eh creeney.

⁶ Ayns thie yn er-cairal ta cooid as couryn: agh boiraghyn ayns cheet-stiagh yn dooinney mee-chrauee.

⁷ Ta ny meillyn creeney skeayley mygeayrt tushtey: agh cha vel cree ny mee-cheeayllee jannoo shen.

⁸ Ta oural ny mee-chrauee dwoaiagh da’n Chiarn: agh t’eh goaill taitnys ayns padjer yn er ynrick.

⁹ Ta raad y drogh pheccagh feohdoil da’n Chiarn: agh shynney lesh eh ta geiyrt er cairys.

¹⁰ Ta smaght feohdagh dasyn ta treigeil y raad, as eshyn nagh gow rish oghsan hed eh naardey.

¹¹ Ta niurin as toyrt-mow kiongoyrt rish y Chiarn, cre wheesh smoo ta creeaghyn cloan gheiney.

¹² Cha vel craidoilagh booiagh jehsyn ta coyrt oghsan da, chamoo nee eh taaghey marish deiney creeney.

¹³ Ta cree boggoil jannoo eddin gennal: agh liorish trimshey yn chree, ta’n spyrryd er ny vrishey.

¹⁴ Ta’n cree echeysyn, ta keeayl echey, shirrey lurg tushtey: agh ta beeal ny mee-cheeayllee beaghey er ommijys.

¹⁵ Ta ooilley laghyn yn ymmyrchagh seaghnagh: agh eshyn ta jeh cree gennal, t’eh dy kinjagh farrail dy mie.

¹⁶ Ny share ta red castrey-cair lesh aggle y Chiarn, na mooarane berchys as seaghyn lesh.

¹⁷ Ny share ta lhongey dy lossreeyn lesh aigney-mie, na brawn beiyht, as myskid lesh.

¹⁸ Ta’n connyssagh doostey streeu: agh eshyn ta moal gys corree, t’eh cur streeu gy-kione.

¹⁹ Ta raad y litcher myr cleiy drineagh: agh ta raad yn er-cairagh jeant rea.

²⁰ Ta mac creeney jannoo ayr gennal; agh ta dooinney ommijagh soiaghey beg jeh e voir.

²¹ Ta ommijys boggey dasyn ta laccal tushtey: agh ta dooinney lowal gimmeeaght jeeragh.

²² Fegooish coyrle ta kiarailyn deiney cheet gys veg: agh ayns ymmodee fir-choyrlee ta shickyrys.

²³ Ta boggey ec dooinney liorish ansoor e veeal as fockle loayrit ayns traa cooie, oh, cre cha mie as te!

²⁴ Ta’n dooinney creeney goll seose ayns raad-mooar y vea, as t’eh shaghney niurin heese.

²⁵ Stroie-ys y Chiarn thie ny mooaralee: agh nee eh niartaghey cagliagh y ven-treoghe.

²⁶ Ta smooinaghtyn ny mee-chrauee feohdoil da’n Chiarn: agh s’eunyssagh ny goan ta cheet veih cree glen.

²⁷ Eshyn ta shleeuit er cosney, t’eh tayrn seaghyn er e hie hene: agh nee eshyn tannaghtyn ta dwoaiagh er giootyn.

²⁸ Ta cree yn er-cairagh imneagh dy chur ansoor lowal: agh ta beeal y drogh ghooinney deayrtey magh goan nieunagh.

²⁹ Ta’n Chiarn foddey veih ny mee-chrauee: agh t’eh clashtyn padjer y vooinjer chairal.

³⁰ Myr ta soilshey ny sooillyn boggey da’n chree, shen myr ta goo mie ooraghey yn slane callin.

³¹ Yn chleaysh ta coyrt geill da oghsan y vea, te lhiantyn gys y vooinjer chreeney.

³² Eshyn obbys ynsagh t’eh soiaghey beg jeh e annym hene: agh eshyn verrys tastey da coyrle, t’eh geddyn tushtey.

³³ Ta aggle y Chiarn yn raad gys creenaght, as ta injillid leeideil gys ooashley.