Raaghyn Creeney 14 - Yn Vible Casherick 1775 1819

CAB. XIV

¹ Ta dy chooilley ven chreeney cummal seose e thie: agh ta’n unnane ommijagh dy phluckey neose eh lesh e laueyn.

² Eh ta gimmeeaght ayns ynrickys, t’eh goaill aggle roish y Chiarn: agh t’eshyn ta camlaagagh ayns e raaidyn soiaghey beg jeh.

³ Ayns beeal yn ommydan ta slatt son e voyrn: agh nee meillyn yn vooinjer chreeney adsyn y choadey.

⁴ Raad nagh vel dew, ta’n chratch follym: agh ta mooarane bishagh liorish niart y dow.

⁵ Cha jean feanish firrinagh breg y insh: agh nee feanish foalsey fockley-magh breagyn.

⁶ Ta’n kialgeyr shirrey creenaght, as cha vel eh cheet lesh: agh ta tushtey aashagh dasyn ta keeayl echey.

⁷ Ny jean sheshaght rish dooinney ommijagh, my t’ou cur-my-ner nagh vel aynsyn ny meillyn dy hushtey.

⁸ Ta creenaght yn er tushtagh dy hoiggal e raad: agh ta ommijys ny mee-chrauee, molteyrys.

⁹ Cha vel ny mee-chrauee agh jannoo craid jeh peccah: agh ta foayr Yee mastey deiney cairal.

¹⁰ Ta’n cree gennaghtyn e herriuid hene, as cha vel ec joarree dy yannoo rish e voggey.

¹¹ Bee thie ny mee-chrauee tilgit bun-ry-skyn: agh nee ynnyd-vaghee deiney mie blaaghey.

¹² Ta raad ayn, as er-lesh dooinney dy vel eh jeeragh: agh ta’n jerrey echey raaidyn y vaaish.

¹³ Ayns eer garaghtee hene, ta’n cree trome, as ta trimshey ayns jerrey yn yennallys cheddin.

¹⁴ Bee eshyn ta cooyl-skyrraghtyn ayns e chree, skee jeh ny raaidyn echey hene: agh bee dooinney mie jeant magh veih hene.

¹⁵ Ta’n ommydan credjal dy chooilley ockle: agh ta’n dooinney creeney jeeaghyn dy mie gys e immeeaght.

¹⁶ Ta dooinney creeney goaill aggle, as scarrey rish olk: agh ta’n ommydan dewil as daaney.

¹⁷ Eshyn ta siyragh gys corree, t’eh ny ommydan, as dooinney lesh saaseyn olk, t’eh dwoaiagh.

¹⁸ Ta’n mee-hushtagh jannoo ommijys e eiraght: agh ta’n vooinjer chreeney coamrit lesh tushtey.

¹⁹ Ta’n olk croymmey roish y vie, as ny mee-chrauee ec giattyn deiney ynrick.

²⁰ Ta beg soit jeh’n voght liorish e naboo hene: agh t’ec y verchagh caarjyn dy liooar.

²¹ Eshyn ta soiaghey beg jeh e naboo, t’eh jannoo peccah: agh eh ta chymmoil er ny boghtyn s’maynrey t’eh.

²² Nagh vel ad er-shaghryn ta shêgin er olk? agh bee myghin as firrinys mâroosyn ta smooinaghtyn dy mie.

²³ Ayns dy chooilley laboraght ta vondeish: agh cha vel agh boghtynid ayns taggloo ny meillyn.

²⁴ Ta berchys attey aalin da sleih creeney: agh cha vel ad agh soilshaghey ommijys yn ommydan.

²⁵ Ta feanish firrinagh sauail bioys: agh ta feanish foalsey loayrt breagyn.

²⁶ Ayns aggle y Chiarn ta shickyrys treishteil: as ec y chloan echey vees boayl dy chemmyrk.

²⁷ Ta aggle y Chiarn farrane y vea, dy haghney ribbaghyn y vaaish.

²⁸ Ayns ymmodee pobble ta ooashley yn ree: agh ayns genney deiney ta prince goll naardey.

²⁹ Eshyn ta moal gys corree, t’eh dy hushtey vooar: agh ta’n dooinney jeh cree siyragh dy vrah yn ommijys echey hene.

³⁰ Ta cree follan slaynt y challin: agh ta troo, loauid ny craueyn.

³¹ Eshyn ta tranlaasagh er y voght, t’eh goltooan e Er-croo: agh t’eh coyrt ooashley dasyn ta chymmoil er ny boghtyn.

³² Ta’n mee-chrauee eiyrit ersooyl ayns e olkys: agh ec yn er-crauee ta treishteil eer ayns e vaase.

³³ Ta creenaght lhie dowin ayns cree yn pheccagh tushtagh: agh ta’n ommydan dy vrah e smooinaghtyn hene.

³⁴ Ta cairys niartaghey ashoon: agh ta peccah ny oltooan da pobble erbee.

³⁵ Ta’n ree goaill taitnys ayns shirveishagh creeney: agh ta e chorree n’oï-syn, t’eh goaill nearey jeh.