Raaghyn Creeney 13 - Yn Vible Casherick 1775 1819

CAB. XIII

¹ Ta mac creeney clashtyn rish ynsagh e ayr: agh cha vel y craidoilagh cur geill da oghsan.

² Yiow dooinney soylley dy chooid vie liorish mess e veeal: agh bee dewilys cronney anmeenyn ny drogh-yantee.

³ Eshyn ta smaghtaghey e veeal, t’eh freayll e vioys: agh eshyn ta fosley lhean e veillyn, hig eh gys toyrt-mow.

⁴ Ta annym y litcher geearree: agh cha vel eh cosney monney: agh bee annym y vooinjer tarroogh jeant sonney.

⁵ Ta dwoaie ec y dooinney ynrick er breagyn: agh ta’n peccagh mee-chrauee feohdoil, as cheet gys nearey.

⁶ Ta ynrickys dy choadey eshyn ta jeeragh ’sy raad: agh ta peccah cur naardey yn drogh-yantagh.

⁷ Ta fer ayn ta lhiggey er dy ve berchagh, ga nagh vel monney echey: as ta fer ayn ta jannoo boght jeh hene ayns mean e verchys.

⁸ Ta e verchys leagh son bioys y dooinney: agh noi’n voght cha vel plaiynt erbee.

⁹ Ta soilshey yn chloan chrauee bio as gennal: agh bee cainle ny mee-chrauee currit ass.

¹⁰ Ynrycan liorish moyrn ta anvea brishey magh: agh ta creenaght mâroosyn ta goaill coyrle vie.

¹¹ Nee’n verchys ta cosnit dy aggairagh lheïe ersooyl: agh eshyn ta chaglym lesh laue tarroogh ynrick, nee eh bishaghey.

¹² Ta’n treishteil ta lhiggit shaghey jannoo ching jeh’n chree: agh tra ta’n yeearree jeant magh, te eer billey dy vea.

¹³ Quoi-erbee soie-ys beg jeh’n goo, hed eh naardey: agh eshyn t’ayns ammys ny annaghyn, yiow eh leagh.

¹⁴ Ta’n leigh da’n dooinney creeney myr chibbyr y vea, dy hyndaa veih ribbaghyn y vaaish.

¹⁵ Ta keeayl vie cosney foayr: agh s’doillee ta raad ny drogh-yantee.

¹⁶ Ta dy chooilley ghooinney toiggalagh dellal lesh tushtey: agh ta’n ommydan dy vrah yn ommijys echey hene.

¹⁷ Ta drogh chaghter duittym ayns olk: agh ta chaghter treishteilagh cur lesh foays.

¹⁸ Ta boghtynid as nearey ny chour-syn obbys ynsagh: agh eshyn ver geill da oghsan, hig eh jeh dy mie.

¹⁹ Ta’n yeearree cooilleenit eunyssagh da’n annym: agh te feohdoil da ny mee-chrauee dy haghney yn olk.

²⁰ Eshyn ta taaghey marish deiney creeney, bee eh creeney: agh bee sheshey ommydanyn currit naardey.

²¹ Ta olk geiyrt er drogh-yantee: agh er y vooinjer chairal bee mie cooilleenit.

²² Ta dooinney mie faagail eiraght da cloan e chlienney: as ta cooid y drogh-yantagh stoyrit cour yn er-cairagh.

²³ Ta nyn saie beaghey ayns farrysthie ny boghtyn: agh ta fer ayn, ta goll mow son laccal tushtey.

²⁴ Eshyn ta sparail e chlatt, cha nhynney lesh e vac: agh eshyn shynney lesh eh, t’eh dy smaghtaghey eh ayns traa.

²⁵ Ta’n dooinney cairal gee dy yannoo magh e yeearree: agh bee bolg ny mee-chrauee shang.