Raaghyn Creeney 12 - Yn Vible Casherick 1775 1819

CAB. XII

¹ Eshyn shynney lesh ynsagh, shynney lesh tushtey: agh eshyn nagh gow rish oghsan, t’eh ny volvane.

² Ta dooinney mie geddyn foayr veih’n Chiarn: agh y dooinney molteyragh nee eh y gheyrey.

³ Cha bee dooinney er ny hickyraghey liorish mee-chraueeaght: agh cha bee fraue yn vooinjer chairagh er ny lhaggaghey.

⁴ Ta ben vie myr attey aalin da’n sheshey eck: agh ish ta tayrn nearey er, t’ee myr loauid ayns e chraueyn.

⁵ Ta smooinaghtyn y dooinney ynrick cairal: agh ta coyrleyn ny mee-chrauee son molteyrys.

⁶ Ta goan ny mee-chrauee dy lhie farkiaght son fuill: agh nee beeal y chloan chairal adsyn y livrey.

⁷ Ta ny mee-chrauee giarit jeh, as cha vel arragh jeu: agh nee thie yn vooinjer ynrick shassoo.

⁸ Yiow dooinney moylley rere e chreenaght: agh bee eshyn ta jeh cree mitchooragh beg soit jeh.

⁹ Ny share ta eshyn, ta ayns stayd injil, as son cooney lesh hene, na eshyn ta moyrnagh jeh hene, as laccal arran.

¹⁰ Ta dooinney myghinagh soiaghey mooar jeh bioys e vaagh: agh ta myghinyn meiygh ny mee-chrauee dewilys.

¹¹ Bee eshyn ta laboragh e halloo jeant magh lesh arran: agh eshyn ta taaghey marish stroialtee, t’eh laccal tushtey.

¹² Ta drogh ghooinney geearree ribbey ny mee-chrauee: agh ta fraue y vooinjer chairagh gymmyrkey mess.

¹³ Ta’n fer olk goit liorish mee-reiltys e veillyn hene: agh hig y vooinjer ynrick ass seaghyn.

¹⁴ Bee dooinney jeant magh lesh mieys, liorish mess e veeal, as rere obbyr e laueyn bee dooinney cooilleenit.

¹⁵ Ta raad ommydan jeeragh ayns e hooillyn hene; agh t’eshyn creeney eaishtys rish coyrle.

¹⁶ Ta corree yn ommydan dy leah cronnit: agh ta dooinney creeney coodaghey nearey.

¹⁷ Eshyn ta loayrt yn irriney, t’eh soilshaghey cairys; agh feanish foalsey, molteyraght.

¹⁸ Ta fer ayn, ta loayrt goll-rish gyerid y chliwe: agh ta slaynt ayns chengey yn dooinney creeney.

¹⁹ Bee meillyn ny firriney er ny hickyraghey son dy bragh: agh cha vel chengey vreagagh agh son tullogh.

²⁰ Ta foalsaght ayns y chree ocsyn ta kiarail olk: agh ta shee cour ny fir-choyrlee sheeoil.

²¹ Cha jean olk erbee taghyrt da’n dooinney cairagh: agh bee ny mee-chrauee laadit lesh olk.

²² Ta meillyn breagagh dwoaiagh da’n Chiarn, agh adsyn ta dellal dy firrinagh t’ad boggey da.

²³ Ta dooinney toiggalagh keiltyn tushtey, agh ta cree ny mee-chrauee fockley magh ommijys.

²⁴ Nee yn laue jeidjagh gymmyrkey reill, agh bee yn mee-rioosagh fo keeshyn.

²⁵ Ta trimshey ayns cree dooinney cur er croymmey: agh ta fockle dooie jannoo gennal jeh.

²⁶ Ta’n dooinney cairal ny s’ooasle na e naboo: agh ta raad ny mee-chrauee cur ad er-shaghryn.

²⁷ Cha vel yn er-liastey gaarlagh shen, ghow eh ayns shelg: agh ta cooid dooinney frioosagh bannaght da.

²⁸ Ayns raad yn ynrickys ta bea, as ayns y chassan shen cha vel nhee baasoil erbee.