Raaghyn Creeney 11 - Yn Vible Casherick 1775 1819

CAB. XI

¹ Ta meihaghyn foalsey dwoaiagh da’n Chiarn: agh ta towse cairagh yn taitnys echeysyn.

² Raad ta moyrn, ta nearey mârish: agh ta creenaght marish ny imlee.

³ Nee ynrickys y vooinjer yeeragh adsyn y leeideil, agh nee mee-reiltys drogh-yantee adsyn y stroie.

⁴ Cha vel berchys jeh foays erbee ayns laa’n cherraghey, agh ta cairys livrey veih baase.

⁵ Nee cairys y dooinney mie eh y choadey er y raad; agh nee yn vee-chrauee tuittym liorish e olkys hene.

⁶ Nee cairys sleih ynrick geddyn feaysley daue: agh bee drogh-yantee goit ’sy volteyrys oc hene.

⁷ Tra ta dooinney mee-chrauee geddyn baase, ta e yerkal cherraghtyn: as ta treishteil ny mee-ynrick goll naardey.

⁸ Ta’n dooinney cairal livreit ass seaghyn, as ta’n drogh ghooinney cheet ’syn ynnyd echey.

⁹ Ta kialgeyr lesh e veeal cur coayl da e naboo; agh liorish tushtey yiow yn fer-firrinagh livrey-ys.

¹⁰ Tra te goll dy mie marish deiney mie, ta’n ard-valley goaill boggey: as tra ta ny mee-chrauee cherraghtyn, ta yllaghey [gennal].

¹¹ Liorish bannaght deiney mie, ta’n ard-valley dy maynrey: agh te currit mow liorish beeal ny mee-chrauee.

¹² Ta’n dooinney mee-hushtagh soiaghey beg jeh e naboo: agh ta dooinney creeney ny host.

¹³ Ta’n skeealleyder dy vrah cooishyn follit: agh ta dooinney treishteilagh keiltyn y chooish.

¹⁴ Raad nagh vel coyrle, ta’n theay goll naardey: agh ayns ymmodee fir-choyrlee ta sauchys.

¹⁵ Eshyn ta raane roish joarree, nee eh surranse er y hon; as eh ta shaghney raanteenys, t’eh shickyr.

¹⁶ Ta ben ghraysoil geddyn ooashley, as deiney pooaral cosney berchys.

¹⁷ Ta’n dooinney myghinagh jannoo mie da’n annym echey hene, agh ta’n dooinney dewil tayrn seaghyn er e chorp hene.

¹⁸ Ta’n mee-chrauee gobbraghey obbyr volteyragh, agh ny chour-syn ta cuirr cairys bee leagh shickyr.

¹⁹ Myr ta cairys leeideil gys bea: myr shen, eshyn eiyrys er yn olk, t’eh geiyrt er gys e hoyrt-mow hene.

²⁰ Adsyn ta jeh drogh chree, t’ad dwoaiagh da’n Chiarn: agh lheid as ta jeeragh ayns nyn raad, t’ad boggey da.

²¹ Ga dy vel laue niartaghey laue, cha bee ny mee-chrauee gyn kerraghey, agh yiow sluight deiney cairal livrey-ys.

²² Myr cliegeen dy airh ayns stroin muickey, myr shen ta ben aalin, fegooish ymmyrkey mie.

²³ Ta yeearree yn dooinney cairal ynrycan son mie: agh bee treishteil y drogh-yantagh ayns anvea.

²⁴ Ta fer ayn ta skeayley, as foast t’eh bishaghey: as ta ayn ta lhiettal ny smoo na ta cooie, agh te tayrn gys boghtynid.

²⁵ Bee’n dooinney feoiltagh jeant magh lesh sonnys, as eshyn ta gushtaghey, bee eh-hene er ny ooraghey.

²⁶ Eshyn ta keiltyn e stoyr arroo, nee yn pobble gwee mollaght er: agh bee bannaght er y chione echeysyn ta dy chreck eh.

²⁷ Eshyn ta dy imneagh shirrey mie y chur er y hoshiaght, t’eh cosney aigney-mie: agh eshyn eiyrys er yn olk, berree eh er.

²⁸ Tuittee eshyn ta coyrt e varrant er e verchys: agh nee yn dooinney crauee goaill blaa myr banglane.

²⁹ Eshyn ta tayrn seaghyn er e hie hene, hed eh lesh y gheay: as bee yn ommydan sharvaant dasyn ta creeney ayns cree.

³⁰ Ta mess y dooinney cairagh billey dy vea, as eshyn chosnys anmeenyn, t’eh creeney.

³¹ Cur-my-ner, my ta deiney cairal seaghnit ’sy theihll shoh: foddey smoo ny mee-chrauee, as ny drogh-yantee.