Raaghyn Creeney 10 - Yn Vible Casherick 1775 1819

CAB. X

¹ Raaghyn creeney Solomon. Ta mac creeney gerjagh e ayrey; agh ta mac ommijagh trimshey da e voir.

² Cha vel tashtaghyn mee-chairagh gys veg yn ymmyd: agh ta ynrickys livrey veih baase.

³ Cha lhig y Chiarn da annym yn er-crauee dy gholl naardey: agh t’eh skeayley cooid ny drogh-yantee.

⁴ T’eh cheet gys boghtynid ta dellal lesh laue lhag: agh ta laue yn er tarroogh jannoo berchagh.

⁵ Eshyn ta chaglym ’sy tourey, t’eh ny ghooinney creeney: agh eh ta liastey ’syn ouyr, t’eh ny vac naareydagh.

⁶ Ta bannaghtyn er kione yn er-cairagh: agh ver tranlaase ny host beeal ny drogh-yantee.

⁷ Ta imraa yn er ynrick bannit: agh nee ennym y vee-chrauee loau ersooyl.

⁸ Nee adsyn ta creeney-chreeagh soiaghey jeh ny annaghyn: agh nee ommydan brynnagh tuittym.

⁹ Eh ta shooyl dy jeeragh, t’eh shooyl shickyr: agh eshyn ta goaill ayns raaidyn cammey, bee eh cronnit.

¹⁰ Eshyn ta meekey lesh e hooill, t’eh tayrn trimshey er hene; agh nee ommydan tutleragh tuittym.

¹¹ Ta beeal y dooinney cairagh chibbyr dy vioys: agh nee tranlaase coodaghey eddin y vee-chrauee.

¹² Ta myskid doostey streeu: agh ta graih coodaghey dy chooilley pheccah.

¹³ Ayns ny meillyn echeysyn ta toiggalagh, ta creenaght er ny gheddyn: agh ta’n slatt son y dreeym echeysyn ta laccal tushtey.

¹⁴ Ta deiney creeney stoyrey seose creenaght: agh ta beeal yn ommydan er-gerrey da toyrt-mow.

¹⁵ Ta cooid y dooinney berchagh e ard-valley lajer: ta trimshey ny boghtyn yn êgin oc.

¹⁶ Ta laboragh yn er-cairagh leeideil gys bea: cheet-stiagh ny mee-chrauee gys peccah.

¹⁷ T’eh ayns raad y vea ta coyrt geill da ynsagh: agh eshyn obbys coyrle, t’eh er-shaghryn.

¹⁸ Eshyn ta keiltyn myskid lesh meillyn breagagh, as eshyn ta cur scammylt er y hoshiaght, t’eh ny ommydan.

¹⁹ Ayns ymmodee goan ta ymmodee peccah, agh eshyn smaghtys e veillyn, t’eh creeney.

²⁰ Ta chengey yn er-cairagh myr reih argid: s’beg feeu ta cree ny mee-chrauee.

²¹ Ta meillyn y dooinney crauee dy ynsaghey ymmodee: agh ta ny mee-cheeayllee goll naardey son laccal creenaght.

²² Ta bannaght y Chiarn berchagh, as cha vel eh coyrt seaghyn erbee lesh.

²³ Te myr gamman da’n ommydan dy yannoo olk: agh ec dooinney lowal ta creenaght.

²⁴ Berree aggle y vee-chrauee er: agh bee yeearree yn er-cairagh jeant magh.

²⁵ Myr ta’n gheay-chassee goll shaghey, cha leah shen ta ny mee-chrauee ec kione: agh ec yn er ynrick ta undin dy bragh farraghtyn.

²⁶ Myr vinegar da ny feeacklyn, as jaagh da ny sooillyn, myr shen ta’n litcher dauesyn ta dy choyrt eh er eilkin.

²⁷ Ta aggle y Chiarn beaynaghey laghyn: agh bee bleeantyn ny mee-chrauee goit giare.

²⁸ Bee boggey ayns treishteil y dooinney cairal: agh nee jerkal y vee-chrauee cherraghtyn.

²⁹ Ta raad y Chiarn niart dauesyn ta jeeragh: agh hig toyrt-mow er ny drogh-yantee.

³⁰ Cha bee yn vooinjer chairal dy bragh astyrit: as cha bee ny mee-chrauee foddey-beayn er y thalloo.

³¹ Ta beeal yn er ynrick cur magh creenaght: agh bee yn chengey vee-reiltagh giarit ass.

³² Ta meillyn y dooinney cairal toiggal ny ta mie: agh ta beeal y drogh ghooinney loayrt dy frourtagh.