Psalmyn 97 - Yn Vible Casherick 1775 1819

PSAL. XCVII

¹ Ta’n Chiarn yn Ree, foddee’n seihll goaill boggey jeh: dy jarroo, foddee ny ymmodee ellanyn boggey ’ghoaill jeh.

² Ta bodjallyn as dorraghys mygeayrt-y-mysh: ta cairys as briwnys coamrey e stoyl-reeoil.

³ Hed aile magh roish: as loshtee eh seose e noidyn er dy chooilley heu.

⁴ Ren ny tendreilyn echey soilshey y choyrt da’n seihll: honnick y thalloo shen, as ve agglit.

⁵ Ren ny croink lheïe goll-rish kere ec fenish y Chiarn: ec fenish Chiarn y slane seihll.

⁶ Ta ny niaughyn er hoilshaghey e chairys: as ta ooilley yn pobble er vakin e ghloyr.

⁷ Bee adsyn ooilley er nyn goyrt gys nearey ta cur ooashley da jallooyn grainnit, as ta goaill taitnys ayns Jeeghyn fardalagh: cur-jee ooashley dasyn, ooilley shiuish Yeeghyn.

⁸ Cheayll Sion jeh shoh, as ghow ee boggey: as va inneenyn Yudah gennal, er graih dty vriwnyssyn, O Hiarn.

⁹ Son t’ou uss, Hiarn, ny syrjey na adsyn ooilley t’er y thalloo: t’ou er dty hoiaghey seose foddey erskyn dy chooilley Yee.

¹⁰ O shiuish ta graihagh er y Chiarn, jeeagh-jee dy der shiu dwoaie da’n olk: ta’n Chiarn coadey anmeenyn e nooghyn; nee eh ad y livrey veih laue ny mee-chrauee.

¹¹ Ta soilshey er n’irree son y vooinjer chairagh: as gennallys gherjoilagh dauesyn ta dy chree firrinagh.

¹² Gow-jee boggey ayns y Chiarn, shiuish sleih ynrick: as cur-jee booise ayns cooinaghtyn jeh e chasherickys.