Psalmyn 96 - Yn Vible Casherick 1775 1819

PSAL. XCVI

¹ O gow-jee arrane noa da’n Chiarn: gow-jee arrane da’n Chiarn, ooilley yn slane seihll.

² Gow-jee arrane da’n Chiarn, as moylley-jee yn Ennym echey: insh-jee magh e haualtys veih laa dy laa.

³ Jean-jee e ooashley y hoilshaghey da ny ashoonyn-quaagh: as e yindyssyn da dy chooilley phobble.

⁴ Son ta’n Chiarn mooar, as cha vod eh dy feeu ’ve er ny voylley: ta ny smoo dy aggle dy ve goit roishyn na dy chooilley Yee.

⁵ Son cha vel ooilley jeeghyn ny ashoonyn agh jallooyn: agh she’n Chiarn chroo ny niaughyn.

⁶ Ta gloyr as ooashley ayns e enish: ta pooar as onnor ayns ynnyd e chasherickys.

⁷ Cur-jee da’n Chiarn, O shiuish chynneeyn y phobble: cheb-jee da’n Chiarn ooashley as pooar.

⁸ Cur-jee da’n Chiarn yn onnor cair da’n Ennym echey: cheb-jee ourallyn, as tar-jee stiagh ayns e chooyrtyn.

⁹ O cur-jee ooashley da’n Chiarn ayns yn ynnyd aalin dy chasherickys: lhig da’n slane seihll ’ve arrymagh ayns e enish.

¹⁰ Insh-jee mastey ny ashoonyn, dy nee yn Chiarn y Ree: as dy nee eshyn eh t’er n’yannoo yn seihll runt cha shickyr nagh vod eh ve er ny scughey, as kys dy jean eh yn pobble y vriwnys dy cairagh.

¹¹ Lhig da ny niaughyn goaill boggey, as lhig da’n thalloo ’ve gennal: lhig da’n faarkey feiyral, as ooilley ny t’ayn.

¹² Lhig da’n magher ’ve lane dy voggey, as ooilley ny t’ayn: eisht nee ooilley biljyn y cheyll boggey ’ghoaill kiongoyrt rish y Chiarn.

¹³ Son t’eh cheet, t’eh cheet dy vriwnys y thalloo: as lesh cairys dy vriwnys y seihll, as y pobble lesh e ynrickys.