Psalmyn 93 - Yn Vible Casherick 1775 1819

PSAL. XCIII

¹ Ta’n Chiarn ny Ree, as er choyrt mysh coamrey gloyroil: ta’n Chiarn er choyrt er e gharmad, as er choamrey eh-hene lesh niart.

² T’eh er n’yannoo yn seihll runt cha shickyr: nagh vod eh v’er ny scughey.

³ Rieau er dy hoshiaght y theihll ta dty stoyl er ny hoiaghey seose: t’ou uss veih dy bragh.

⁴ Ta ny thooillaghyn er hroggal, O Hiarn, ta ny thooillaghyn er hroggal seose nyn goraa: ta ny thooillaghyn er hroggal seose ny tonnyn oc.

⁵ Ta tonnyn ny marrey niartal, as jannoo feiyr atchimagh: agh ny-yeih ta’n Chiarn, ta cummal er yn yrjid, ny s’niartal.

⁶ Ta ny recortyssyn ayd’s, O Hiarn, feer shickyr: ta casherickys cooie da dty hie son dy bragh.