Psalmyn 92 - Yn Vible Casherick 1775 1819

PSAL. XCII

¹ Te red gerjoilagh dy chur booise da’n Chiarn: as dy ghoaill arraneyn-moyllee gys dt’Ennym’s, O Uss smoo syrjey;

² Dy insh jeh dty chenjallys-ghraihagh dy moghey ’sy voghrey: as jeh dt’ynrickys ayns traa ny hoie.

³ Er greïe-chiaull dy yeih strengyn, as er y lute: er greïe ard, as er y chlaasagh.

⁴ Son t’ou uss, Hiarn, er my yannoo gennal trooid dt’obbraghyn: as goym boggey ayns coyrt moylley son obbraghyn dty laueyn.

⁵ O Hiarn, cre cha gloyroil as ta dt’obbraghyn: ta dty smooinaghtyn feer dowin!

⁶ Cha vel dooinney neu-chreeney cur tastey mie da shoh: as cha vel ommydan dy hoiggal eh.

⁷ Tra ta’n vee-chrauee glass myr y faiyr, as tra t’adsyn ooilley ta gobbraghey olkys bishaghey: eisht bee ad er nyn stroie son dy bragh: agh uss, Hiarn, yn Fer smoo syrjey son dy bragh.

⁸ Son cur-my-ner, nee dty noidyn, O Hiarn, cur-my-ner, nee dty noidyn cherraghtyn: as bee adsyn ooilley ta gobbraghey mee-chraueeaght er nyn stroie;

⁹ Agh bee my chione’s er ny hroggal seose myr eairk unicorn: son ta mee er m’ooilaghey lesh ooil noa.

¹⁰ Hee my hooill neesht e aigney er my noidyn: as nee my chleaysh clashtyn e yeearree er ny mee-chrauee ta girree magh m’oï.

¹¹ Nee yn dooinney cairagh blaaghey myr y billey-palm: as skeayley dy lhean myr y billey-cedar ayns Libanus.

¹² Nee nyn lheid as t’er nyn soiaghey ayns thie yn Chiarn: bishaghey ayns cooyrtyn thie yn Jee ain.

¹³ Ver ad magh neesht ny smoo dy vess ayns nyn shenn eash: as bee ad roauyr as jeeaghyn dy mie.

¹⁴ Dy vod ad soilshaghey cre cha firrinagh as ta’n Chiarn my niart: as nagh vel veg y neu-ynrickys aynsyn.