Psalmyn 91 - Yn Vible Casherick 1775 1819

PSAL. XCI

¹ Quoi-erbee ta cummal fo coadey yn Fer smoo ard: nee eh tannaghtyn fo scaa yn Ooilley-niartal.

² Jir-ym rish y Chiarn, Uss my hreishteil, as my hoor lajer: my Yee, ersyn ver-ym my varrant;

³ Son nee eh dty livrey veih ribbey yn shelgeyr: as veih’n chramp baasoil.

⁴ Nee eh uss y choadey fo e skianyn, as bee oo sauchey fo ny fedjagyn echey: e irrinys as e ynrickys vees dty eïlley as dt’endeil.

⁵ Cha bee aggle ort roish atchim erbee ’syn oie: ny roish y tide ta lhiggit ’sy laa:

⁶ Roish y chramp ta shooyl ’sy dorraghys: ny roish y chingys ta stroie ec y vun-laa.

⁷ Nee thousane tuittym rish dty lhiattee, as jeih thousaneyn ec dty laue yesh: agh cha jig eh dt’aare.

⁸ Dy jarroo, lesh dty hooillyn ver oo my-ner: as hee oo leagh ny mee-chrauee.

⁹ Son t’ou uss, Hiarn, my yerkal: t’ou er hoiaghey yn thie ayd dy chemmyrk feer ard.

¹⁰ Cha jean olk erbee taghyrt dhyt: chamoo nee chingys trome erbee cheet faare dty chummal;

¹¹ Son ver eh currym da e ainleyn harryd: dy dty reayll ayns ooilley dty raaidyn.

¹² Nee ad oo y ymmyrkey ayns nyn laueyn: nagh gortee oo dty chass noi clagh.

¹³ Nee oo shooyl er y lion, as yn adder: stampee oo yn lion aeg as y dragon fo dty chassyn.

¹⁴ Er-yn-oyr dy vel eh er hoiaghey e ghraih orrym, shen-y-fa livrey-ym eh: neem’s eh y hoiaghey seose, er-y-fa dy vel enney echey er m’Ennym.

¹⁵ Nee eh geamagh orrym, as ver-ym clashtyn da: dy jarroo, ta mee mârish ayns seaghyn; livrey-ym eh, as ver-ym lhiam eh gys onnor.

¹⁶ Lesh bea liauyr neem’s eh y yannoo booiagh: as soilshee-ym da my haualtys.