Psalmyn 89 - Yn Vible Casherick 1775 1819

PSAL. LXXXIX

¹ Bee m’arrane kinjagh jeh kenjallys-ghraihagh y Chiarn: lesh my veeal beem’s dy bragh soilshaghey dt’irriney veih un sheeloghe gys sheeloghe elley.

² Son ta mee er ghra, Bee myghin er ny hoiaghey seose son dy bragh: dt’irriney nee oo y hickyraghey ayns ny niaughyn.

³ Ta mee er yannoo conaant rish my er-reiht: ta mee er vreearrey da David my harvaant;

⁴ Dty luight’s neem’s y hickyraghey son dy bragh: as dty stoyl-reeoil y hoiaghey seose veih sheeloghe gys sheeloghe.

⁵ O Hiarn, nee ny niaughyn hene dt’obbraghyn yindyssagh y voylley: as dt’irriney ayns sheshaght ny nooghyn.

⁶ Son quoi eh erskyn ny bodjallyn: vees er ny hoylaghey rish y Chiarn?

⁷ As quoi eshyn mastey ny Jeeghyn: vees casley rish y Chiarn?

⁸ Ta aggle feer vooar dy v’er ny ghoaill roish Jee ayns chaglym-cooidjagh ny nooghyn: as ta arrym dy ve er ny choyrt da lioroosyn ooilley ta mygeayrt-y-mysh.

⁹ O Hiarn Yee jeh sheshaght flaunys, quoi ta goll rhyt’s: ta dt’irriney, Hiarn smoo niartal, er dy chooilley heu.

¹⁰ T’ou reill dewlys ny marrey: t’ou kiunaghey ny tonnyn eck tra t’ad troggal.

¹¹ T’ou er choyrt Egypt fo-chosh, as er stroie eh: t’ou er skeayley dty noidyn dy lhean lesh dty roih niartal.

¹² Ta ny niaughyn lhiat’s, lhiat’s myrgeddin yn thalloo: t’ou er hoiaghey undin y seihll runt, as ooilley ny t’ayn.

¹³ T’ou er yannoo yn twoaie as y jiass: nee Tabor as Hermon boggey y ghoaill ayns dty Ennym.

¹⁴ Ta roih niartal ayd: s’lajer ta dty laue’s, as ard ta dty laue yesh.

¹⁵ Cairys as corrymid ta stoyl-reeoil dty ynnyd-vaghee: hed myghin as firrinys roish dt’eddin.

¹⁶ Bannit ta’n pobble, O Hiarn, oddys boggey y ghoaill aynyd: nee ad gimmeeaght ayns soilshey dt’eddin.

¹⁷ Bee yn taitnys oc gagh laa ayns dt’Ennym’s: as ayns dty chairys nee ad boggyssagh;

¹⁸ Son uss gloyr y niart oc: as ayns dty chenjallys-ghraihagh nee oo nyn ghing y hroggal seose.

¹⁹ Son ta’n Chiarn nyn vendeilagh: ta’n Er Casherick dy Israel nyn Ree.

²⁰ Loayr oo keayrt dy row ayns ashlishyn rish dty nooghyn, as dooyrt oo: Ta mee er choyrt cooney er fer ta niartal; Ta mee er hoiaghey seose fer reiht ass y pobble.

²¹ Ta mee er gheddyn David my harvaant: lesh my ooil chasherick ta mee er n’ooilaghey eh.

²² Cummee my laue eshyn dy shickyr: as nee my roih eh y niartaghey.

²³ Cha bee yn noid abyl tranlaase y yannoo er: cha jean mac yn olkys aggair y yannoo da.

²⁴ Bwoaill-ym sheese e noidyn kiongoyrt rish yn eddin echey: as nee’m adsyn y stroie ta feoh oc ersyn.

²⁵ Bee m’irriney neesht as my vyghin mârish: as ayns m’Ennym’s bee’n niart echey er ny hoiaghey seose.

²⁶ Soie-ym seose yn reill echey neesht er yn aarkey: as e laue yesh ayns ny thooillaghyn.

²⁷ Nee eh geamagh hym, She uss my Ayr: my Yee, as my haualtys lajer.

²⁸ As neem’s eh y yannoo my vac shinney: ny syrjey na reeaghyn y thallooin.

²⁹ Freill-ym my vyghin er e hon son dy bragh: as shassee my chonaant shickyr mârishyn.

³⁰ Ver-ym er y sluight echey myrgeddin dy arraghtyn son dy bragh: as y stoyl-reeoil echey myr laghyn niau.

³¹ Agh my hreigys yn chloan echey my leigh: as nagh n’immee ad ayns my vriwnyssyn;

³² My vrishys ad my lattyssyn, as nagh vreill ad m’annaghyn; neem’s ny foiljyn oc y cherraghey lesh y clatt, as nyn beccah lesh buillaghyn.

³³ Ny-yeih, my chenjallys-ghraihagh cha goym dy bollagh voish: chamoo lhiggym da m’irriney dy ailleil.

³⁴ My chonaant cha jean-ym y vrishey, ny yn red y chaghlaa t’er n’gholl magh ass my veillyn: ta mee er n’yannoo breearrey un cheayrt liorish my chasherickys, nagh vaill-ym David.

³⁵ Nee yn sluight echey tannaghtyn son dy bragh: as ta’n stoyl echey goll-rish y ghrian kiongoyrt rhym.

³⁶ Nee eh shassoo shickyr son dy bragh myr yn eayst: as myr yn feanish firrinagh ayns niau.

³⁷ Agh t’ou er chur cooyl rish as er hreigeil dt’Er-ooilit: as t’ou jymmoosagh rish.

³⁸ T’ou er vrishey conaant dty harvaant: as er hilgey yn attey echey gys y thalloo.

³⁹ T’ou er lhieggal ooilley e voallaghyn: as er vrishey sheese ny tooryn lajer echey.

⁴⁰ T’adsyn ooilley ta goll shaghey dy spooilley eh: as t’eh er jeet dy ve ny oltooan da e naboonyn.

⁴¹ T’ou er hoiaghey seose laue yesh e noidyn: as er chur orroosyn ooilley va n’oï dy ghoaill boggey.

⁴² T’ou er ghoaill ersooyl foyr e chliwe: as cha vel oo cur da barriaght ayns y chaggey.

⁴³ T’ou er choyrt ass e ghloyr: as er hilgey e stoyl-reeoil sheese gys y thalloo.

⁴⁴ Laghyn e aegid t’ou er n’yannoo giare: as er choodaghey eh lesh mee-ooashley.

⁴⁵ Hiarn, caïd nee uss oo hene y ollaghey, nee son dy bragh: as jean dty chorree lostey goll-rish aile?

⁴⁶ O cooinee cre cha giare as ta my hraa: cre’n-fa t’ou uss er n’yannoo dy chooilley ghooinney dy ve fardalagh?

⁴⁷ Quoi’n dooinney ta bio, nagh vaik y baase: as jean eh yn annym echey y livrey veih laue yn oaie?

⁴⁸ Hiarn, cre vel dty henn chenjallyssyn-graihagh: yiall oo lesh breearrey da David ayns dt’irriney?

⁴⁹ Cooinee, Hiarn, er yn oltooan t’ec dty harvaantyn: as kys ta mee gymmyrkey ayns m’oghrish scammyltyn ymmodee sleih;

⁵⁰ Lhieu ta dty noidyn er dty oltooaney; as er hilgey scammylt er kesmadyn dt’Er-ooilit: dy row yn Chiarn er ny voylley son dy bragh. Amen, as Amen.