Psalmyn 79 - Yn Vible Casherick 1775 1819

PSAL. LXXIX

¹ O Yee, ta ny ashoonyn-quaagh er jeet stiagh ayns dt’eiraght: dty hiamble casherick t’ad er yannoo neu-ghlen, as er yannoo Jerusalem carnane dy chlaghyn.

² Kirp marroo dty harvaantyn t’ad er choyrt dy ve beaghey da eeanlee’n aer: as feill dty nooghyn da beïyn y thallooin.

³ Yn uill oc t’ad er gheayrtey myr ushtey er dy chooilley heu dy Yerusalem: as cha row dooinney erbee dy oanluckey ad.

⁴ Ta shin er jeet dy ve nearey foshlit da nyn noidyn: eer craid as faghid dauesyn ta mygeayrt-y-mooin.

⁵ Hiarn, caïd vees oo corree: jean dty eadolys lostey myr aile son dy bragh?

⁶ Deayrt magh dt’eulys er ny ashoonyn nagh vel er choyrt enney ort’s: as er ny reeriaghtyn nagh vel er n’eamagh er dt’Ennym;

⁷ Son t’ad er choyrt mow Jacob: as er choyrt naardey e ynnyd-vaghee.

⁸ O ny cooinee er ny shenn pheccaghyn ain, agh jean myghin orrin, as shen dy leah: son ta shin er jeet gys treihys vooar.

⁹ Cooin lhien, O Yee jeh nyn saualtys, son gloyr dt’Ennym: O livrey shin, as bee myghinagh da nyn beccaghyn son graih dty Ennym.

¹⁰ Cre’n-fa ta ny ashoonyn-quaagh gra: Cre vel nish yn Jee oc?

¹¹ O lhig da kerraghey fuill dty harvaantyn t’er ny gheayrtey: ve dy foshlit er ny hoilshaghey er ny ashoonyn-quaagh ’sy chilley ain.

¹² O lhig da osnaghyn trimshagh ny pryssoonee cheet kiongoyrt rhyt: cordail rish mooadys dty phooar, jean uss adsyn y choadey t’er nyn oardaghey gys baase;

¹³ As son ny goan mollaghtagh lhieu ta nyn naboonyn er dty oltooaney: jean uss ad y chooilleeney, O Hiarn, shiaght filley ayns yn oghrish oc.

¹⁴ Myr shen ver shinyn ta dty phobble, as kirree dty phastyr, booise dhyt’s son dy bragh: as bee mayd dy kinjagh soilshaghey magh dty voylley veih sheeloghe gys sheeloghe.