Psalmyn 76 - Yn Vible Casherick 1775 1819

PSAL. LXXVI

¹ Ayns Judea ta enney er ny choyrt er Jee: ta’n ennym echey mooar ayns Israel.

² Ec Salem ta e chabbane-agglish: as e chummal ayns Sion.

³ Ayns shen vrish eh sideyn y vhow: yn shleiy, yn cliwe, as y ghreïe-chaggee.

⁴ T’ou jeh onnor as niart smoo: na croink ny roosteyryn.

⁵ Ta’n vooinjer voyrnagh er nyn roostey, t’ad er ghoaill nyn gadley baaish: as ooilley ny deiney va ny laueyn oc niartal, cha vel ad er gheddyn monney.

⁶ Ec yn oghsan ayd’s, O Yee Yacob: ta chammah yn ainagh as y cabbyl er duittym.

⁷ T’ou uss, dy jarroo uss as aggle dy ve er ny ghoaill royd: as quoi oddys shassoo ayns dty hilley tra t’ou corree?

⁸ Hug oo er dty vriwnys dy ve er ny chlashtyn veih niau: va’n ooir er-creau, as ve ny host,

⁹ Tra dirree Jee gys briwnys: as dy chooney lesh ooilley yn vooinjer imlee er y thalloo.

¹⁰ Nee elgys dooinney chyndaa gys dty voylley: as yn elgys ocsyn nee uss eh y smaghtaghey.

¹¹ Jean-jee gialdyn da’n Chiarn y Jee eu, as cooilleen-jee eh, ooilley shiuish ta mygeayrt-y-mysh: cur-jee lhieu giootyn huggeysyn lhisagh aggle ve goit roish.

¹² Nee eshyn ginjillaghey spyrryd princeyn: as t’eh yindyssagh mastey reeaghyn y thallooin.