Psalmyn 74 - Yn Vible Casherick 1775 1819

PSAL. LXXIV

¹ O Yee, cre’n-fa t’ou freayll oo hene voïn choud dy hraa: cre’n-fa ta dty yymmoose cha cheh noi kirree dty phastyr?

² O smooinee er dty phobble t’ou er chionnaghey, as er veaysley er-dyn chenn earish.

³ Smooinee er sheeloghe dty eiraght: as er cronk Sion, ayn t’ou er chummal.

⁴ Trog seose dty chassyn, dy vod oo dy bollagh dy chooilley noid y stroie: t’er n’yannoo olk ayns dt’ynnyd casherick.

⁵ Ta dty noidyn gyllaghey ayns mean dty haglym cooidjagh: as soiaghey seose nyn mergaghyn son cowraghyn.

⁶ Eshyn ren fuygh y yiarey sheese roish nish ass ny biljyn chiu: v’eh ry-akin dy chur lesh eh gys obbyr aalin.

⁷ Agh nish t’ad brishey sheese ooilley yn obbyr ghrainnit eck: lesh teighyn as oayrdyn.

⁸ T’ad er hoiaghey dt’ynnydyn casherick er aile: as er lhieggal sheese ynnyd-vaghee dt’Ennym, eer gys y laare.

⁹ Dy jarroo, dooyrt ad ayns nyn greeaghyn, Lhig dooin ad y stroie dy bollagh ooilley-cooidjagh: myr shoh t’ad er lostey seose ooilley thieyn Yee ’sy cheer.

¹⁰ Cha vel shin fakin nyn gowraghyn; cha vel phadeyr er-mayrn: cha vel unnane ta toiggal caïd.

¹¹ O Yee, caïd nee eshyn ta dt’oï yn vee-onnor shoh y yannoo: caïd nee yn noid loayrt dy mollaghtagh noi dt’Ennym, nee son dy bragh?

¹² Cre’n-fa t’ou tayrn back dty laue: kys te nagh vel oo goaill dty laue yesh ass dt’oghrish dy chur mow yn noid?

¹³ Son Jee my Ree er-dyn chenn earish: yn cooney ta jeant er y thalloo, eh-hene ta dy yannoo eh.

¹⁴ Ren oo yn aarkey y scarrey trooid dty phooar: vrish oo king ny dragonyn ayns ny ushtaghyn.

¹⁵ Woaill oo king y Leviathan ayns peeshyn: as hug oo eh dy ve son beaghey da’n pobble ayns yn aasagh.

¹⁶ Hug oo lhiat farraneyn, as ushtaghyn magh ass ny creggyn creoi: hyrmee oo seose ushtaghyn niartal.

¹⁷ She lhiat’s yn laa, as lhiat’s yn oie: uss t’er phointeil yn soilshey as y ghrian.

¹⁸ T’ou er hoiaghey ooilley cagliaghyn ny hooirey: t’ou er yannoo sourey as geurey.

¹⁹ Cooinee er shoh, O Hiarn, kys ta’n noid er oltooaney: as kys ta’n pobble ommijagh er loayrt goan mollaghtagh noi dty Ennym.

²⁰ O ny livrey annym dty chalmane meen gys earroo ny noidyn: as ny jarrood sheshaght ny boghtyn son dy bragh.

²¹ Jeeagh er y chonaant: son ta ooilley yn ooir lane dy ghorraghys as dy chummallyn dewil.

²² O ny lhig da’n vooinjer gyn-loght goll roue lesh nearey: agh lhig da ny boghtyn as ny ymmyrchee moylley ’choyrt da dt’Ennym.

²³ Trog, O Yee, jean dty chooish hene y chummal seose: cooinee kys ta’n dooinney ommijagh dy dt’oltooaney dy chooilley laa.

²⁴ Ny jarrood coraa dty noidyn: ta’n daanys vooaralagh ocsyn ta feoh oc ort, gaase dy kinjagh ny smoo as ny smoo.