Psalmyn 71 - Yn Vible Casherick 1775 1819

PSAL. LXXI

¹ Aynyd’s, O Hiarn, ta mee er choyrt my hreishteil; ny lhig dou dy bragh v’er my choyrt gys nearey: agh feayshil orrym, as livrey mee ayns dty chairys; croym dty chleaysh hym, as saue mee.

² Bee oo my chummal lajer, huggey oddym’s kinjagh goll son sauchys: t’ou er yialdyn dy chooney lhiam; son oo thie m’endeilys as my chashtal.

³ Livrey mee, O my Yee, veih pooar ny mee-chrauee: veih laue yn dooinney neu-chairagh as dewil.

⁴ Son dty lurg’s, O Hiarn Yee, ta mee goaill foddeeaght: uss my hreishteil, dy jarroo veih m’aegid.

⁵ Liort’s ta mee er ny chummal seose neayr as ruggyr mee: uss ren m’y ghoaill ass breïn my vayrey; bee my voylley dy bragh jeed’s.

⁶ Ta mee er jeet dy ve shilley agglagh da ymmodee: agh ta my hreishteil shickyr aynyd’s.

⁷ O lhig da my veeal v’er ny lhieeney lesh dty voylley: dy voddym arrane y ghoaill jeh dty ghloyr as dty onnor slane lhiurid y laa.

⁸ Ny tilg mee ersooyl ayns my henn eash: ny treig mee tra ta my niart dy m’ailleil;

⁹ Son ta my noidyn loayrt m’oï, as t’adsyn ta lhie farkiaght son m’annym, coyrt nyn goyrle dy cheilley, gra: Ta Jee er hreigeil eh; eiyr-jee er, as gow-jee eh; son cha vel fer erbee dy livrey eh.

¹⁰ Ny gow foddey voym, O Yee: my Yee, jean siyr dy chooney lhiam.

¹¹ Lhig dauesyn ta noi m’annym ve er nyn goyrt mow as cherraghtyn: lhig daue ve coodit lesh nearey as mee-ooashley ta shirrey dy yannoo aggair dou.

¹² Agh er my hon’s nee’m dy meen farkiaght dy kinjagh: as moyll-ym oo ny smoo as ny smoo.

¹³ Loayree my veeal dagh laa jeh dty chairys as jeh dty livrey-ys: son cha nhione dou yn earroo oc.

¹⁴ Hem magh ayns niart y Chiarn Jee: as loayr-ym ynrycan jeh dty chairys.

¹⁵ T’ou uss, O Yee, er m’ynsaghey veih m’aegid derrey nish: shen-y-fa soilshee-yms magh dty obbraghyn yindyssagh.

¹⁶ Ny treig mee, O Yee, ayns my henn eash, tra ta my chione lheeah:; derrey ta mee er hoilshaghey dty niart da’n cheeloghe shoh, as dty phooar dauesyn ooilley ta foast ry-hoi cheet.

¹⁷ Ta dty chairys, O Yee, feer ard, as s’mooar ny reddyn shen t’ou er n’yannoo: O Yee, quoi ta dy ve er ny hoylaghey hood’s!

¹⁸ O cre’n seaghyn as yn arkys trome t’ou er choyrt my raad! as foast hyndaa oo as ren oo mee y ooraghey: dy jarroo, as hug oo lhiat mee reesht veih diunid ny hooirey.

¹⁹ T’ou er chur lhiat mee gys onnor: as er my gherjaghey er dy chooilley heu;

²⁰ Shen-y-fa nee’m uss as dt’irriney y voylley, O Yee, cloie er greïe dy vingys: hood’s goym arrane er y chlaasagh, O uss er-casherick dy Israel.

²¹ Bee my veillyn gennal tra ta mee goaill arrane hood’s: as myr shen vees m’annym t’ou uss er ny livrey.

²² Nee my hengey myrgeddin loayrt jeh dty chairys fey-ny-laa: son t’ad er nyn goyrt mow as er nyn goyrt lhieu gys nearey, ta shirrey olk y yannoo dooys.