Psalmyn 7 - Yn Vible Casherick 1775 1819

PSAL. VII

¹ O Hiarn my Yee, aynyd’s ta mee er choyrt my hreishteil: saue mee vouesyn ooilley ta jannoo tranlaase orrym, as livrey mee;

² Er-aggle dy stroie eh my vioys myr lion, as eh y raipey dy peeshyn: choud as nagh vel unnane dy chooney lhiam.

³ O Hiarn my Yee, my ta mee er n’yannoo veg dy lheid y red: ny my ta olkys erbee ayns my laueyn;

⁴ My ta mee er chooilleeney olk dasyn ren dellal dy dooie rhym: (ta mee eer er livrey eshyn ta my noid fegooish oyr;)

⁵ Eisht lhig da my noid eiyrtys y yannoo er m’annym, as my ghoaill: dy jarroo lhig da my vioys y stampey sheese er y thalloo, as cur my onnor ny lhie ’sy joan.

⁶ Irree, O Hiarn, ayns dty chorree, as trog oo hene seose, kyndagh rish farg my noidyn: shass er my hon ayns y vriwnys t’ou er harey.

⁷ As myr shen hig chaglym y phobble mygeayrt-y-mood: er y ghraih ocsyn eisht trog seose oo hene reesht.

⁸ Nee’n Chiarn yn pobble y vriwnys; cur briwnys lhiam, O Hiarn: lurg my ynrickys, as cordail rish y neu-loghtynid t’aynym.

⁹ O lhig da olkys ny mee-chrauee cheet gys jerrey: agh jean uss yn sleih ynrick y leeideil.

¹⁰ Son ta’n Jee cairal: prowal ny creeaghyn, as ny meeghyn.

¹¹ Ta my chooney cheet veih Jee: ta coadey adsyn ta ynrick ayns cree.

¹² Ta Jee briw cairagh, niartal as surransagh: as ta Jee er ny vrasnaghey dy chooilley laa.

¹³ Mannagh jean dooinney chyndaa, nee eh shleeu e chliwe: t’eh er lhoobey e vhow, as er n’yannoo eh aarloo.

¹⁴ T’eh er chiarail ny chour ny greinyn baaish: t’eh coyrt magh e hideyn noi ny tranlaasee.

¹⁵ Cur-my-ner, t’eh er-troailt er olkys: t’eh er yiennaghtyn trimshey, as er n’ymmyrkey mee-chairys.

¹⁶ T’eh er vosley as er chleiy ooig: as t’eh hene er duittym ayns y ribbey v’eh kiarail da fer elley.

¹⁷ Son hig e obbyr er e chione hene: as tuittee yn olkys echey er e vollag hene.

¹⁸ Ver-yms booise da’n Chiarn, cordail rish e chairys: as neem’s moylley Ennym y Chiarn smoo Ard.