Psalmyn 67 - Yn Vible Casherick 1775 1819

PSAL. LXVII

¹ Dy row Jee myghinagh dooin, as dy bannee eh shin: as soilshey e eddin y yeeaghyn dooin, as dy row eh myghinagh dooin.

² Dy vod enney v’er ny choyrt er dty raad er y thalloo: dty haualtys anmey mastey dy chooilley ashoon.

³ Lhig da’n pobble uss y voylley, O Yee: dy jarroo lhig da ooilley’n pobble moylley ’choyrt dhyt.

⁴ O lhig da ny ashoonyn boggey ’ghoaill as ve gennal: son nee uss y pobble y vriwnys dy cairal, as ny ashoonyn y reill er y thalloo.

⁵ Lhig da’n pobble uss y voylley, O Yee: dy jarroo lhig da ooilley’n pobble moylley ’choyrt dhyt.

⁶ Eisht nee’n thalloo cur magh e bishaghey: as nee Jee, dy jarroo yn Jee ain, e vannaght y choyrt dooin.

⁷ Nee Jee shin y vannaghey: as nee dy chooilley ard jeh’n seihll aggle y ghoaill roish.