Psalmyn 65 - Yn Vible Casherick 1775 1819

PSAL. LXV

¹ T’ou uss, O Yee, er ny voylley ayns Sion: as dhyt’s vees y breearrey er ny chooilleeney ayns Jerusalem.

² Uss ta clashtyn y phadjer: hood’s nee dy chooilley eill cheet.

³ Ta my ghrogh-yannoo geddyn y varriaght orrym: O bee uss myghinagh da nyn beccaghyn.

⁴ Bannit ta’n dooinney t’ou uss dy reih, as dy ghoaill hood hene: nee eh baghey ayns dty chooyrt, as bee eh jeant magh lesh eunyssyn dty hie, dy jarroo dy dty hiamble casherick.

⁵ Nee oo jeeaghyn dooin reddyn yindyssagh ayns dty chairys, O Yee nyn Saualtys: uss ta sauchys ooilley king y theihll, as dauesyn ta cummal er y faarkey lhean.

⁶ Ta ayns e niart soiaghey ny sleityn dy shickyr: as t’er ny choamrey lesh pooar.

⁷ Ta kiunaghey sterrym ny marrey: as feiyr ny tonnyn echey, as mee-reiltys y phobble.

⁸ Adsyn myrgeddin ta baghey ayns ny ayrnyn sodjey magh jeh’n seihll, vees agglagh roish dty chowraghyn: uss ta cur er immeeaght y voghrey as yn astyr dy chur dhyt moylley.

⁹ T’ou jeeaghyn er y thalloo, as dy vannaghey eh: t’ou jannoo eh feer vessoil.

¹⁰ Ta awin Yee lane dy ushtey: t’ou cur er yn arroo oc bishaghey; son myr shoh t’ou kiarail son y seihll.

¹¹ T’ou gushtaghey ny creaghyn eck, t’ou cur fliaghey neose er ny coanyn beggey eck: t’ou boggaghey ee lesh ny bineyn dy ’liaghey, as bannaghey yn mess eck.

¹² T’ou coamrey yn vleïn lesh dty vieys: as ta dty vodjallyn shilley neose meeaylys.

¹³ Nee ad shilley neose er cummallyn yn aasagh, as gowee ny croink veggey boggey er dagh cheu.

¹⁴ Bee ny bwoailtchyn lane dy chirree: nee ny coanyn myrgeddin shassoo cha chiu lesh arroo, dy jean ad gearey as goaill arrane.