Psalmyn 62 - Yn Vible Casherick 1775 1819

PSAL. LXII

¹ Ta m’annym dy firrinagh farkiaght dy kinjagh er Jee: son veihsyn ta my haualtys.

² Eshyn dy feer my niart as my haualtys: eshyn my endeil, myr shen nagh bee my lhieggey mooar.

³ Caïd smooinys shiu er olk noi dy chooilley ghooinney: hed shiu er stroie ooilley yn sorch eu; dy jarroo, myr voalley ta aarloo dy huittym vees shiu, as myr cleiy brisht.

⁴ Ta’n smooinaghtyn croutagh oc ny-lomarcan kys dy chur eshyn sheese baillish Jee y hoiaghey seose: t’ad goaill taitnys ayns breagyn; t’ad cur goan mie lesh nyn meeal, agh gweeaghyn ayns nyn gree.

⁵ Ny-yeih, m’annym, farkee uss dy kinjagh er Jee: son ta my hreishteil aynsyn.

⁶ Eshyn dy firrinagh my niart as my haualtys: eshyn my endeilagh, myr shen nagh duittym.

⁷ Ayns Jee ta my lhaynt as my ghloyr: creg my niart, as ayns Jee ta my hreishteil.

⁸ O cur-jee nyn marrant er dy kinjagh, shiuish phobble: deayrt-jee magh nyn greeaghyn kiongoyrt rish; son ta Jee nyn dreishteil.

⁹ Er son cloan gheiney, cha vel ad agh fardail: ta cloan gheiney molteyragh er ny meihaghyn, t’ad ooilley-cooidjagh ny s’eddrym na fardalys hene.

¹⁰ O ny treisht-jee ayns aggair as roosteyrys; ny cur-jee shiu hene seose gys molteyrys: my ta berchys bishaghey, ny soie-jee nyn gree orroo.

¹¹ Loayr Jee un cheayrt, as daa cheayrt ta mish er chlashtyn y lheid cheddin: dy vel pooar bentyn gys Jee;

¹² As dy vel uss, Hiarn, myghinagh: son t’ou cooilleeney dy chooilley ghooinney cordail rish e obbyr.