Psalmyn 60 - Yn Vible Casherick 1775 1819

PSAL. LX

¹ O Yee t’ou er hilgey shin magh, as er skeayley shin dy lhean: t’ou myrgeddin er ve jymmoosagh rooin; O chyndaa hooinyn reesht.

² T’ou er ghleashaght y cheer, as er scarrey eh: slaanee ny chingyn echey, son te craa.

³ T’ou er yeeaghyn da dty phobble reddyn trimshagh: t’ou er choyrt dooin jough feeyney baasoil.

⁴ T’ou er choyrt cowrey da nyn lheid as ta goaill aggle royd: dy vod ad boggyssagh er coontey yn irriney.

⁵ Shen-y-fa va’n vooinjer bynney lhiat er nyn livrey: cooin lhiam lesh dty laue yesh, as clasht rhym.

⁶ Ta Jee er loayrt ayns e chasherickys, Nee’m boggey ’ghoaill as rheynn-ym Sichem: as towse-ym magh coan Succoth.

⁷ Ta Gilead lhiam’s, as lhiam’s Manasses: ta Ephraim myrgeddin niart my chione; she Juda ta coyrt my leigh.

⁸ Moab my haagh-nieeaghyn, shooill-ym harrish Edom: Philistia, gow uss boggey jee’m.

⁹ Quoi nee m’y leeideil ayns yn ard-valley lajer: quoi ver lesh mee stiagh gys Edom?

¹⁰ Nagh vel uss er hilgey magh shin, O Yee: Nagh jean uss, O Yee, goll magh marish ny sheshaghtyn-caggee ain?

¹¹ O bee uss nyn gooney ayns seaghyn: son s’fardalagh ta cooney dooinney.

¹² Trooid Jee nee mayd obbraghyn mooarey: son she eshyn stampys sheese nyn noidyn.