Psalmyn 57 - Yn Vible Casherick 1775 1819

PSAL. LVII

¹ Bee myghinagh dooys, O Yee, bee myghinagh dou, son ta m’annym treishteil aynyd: as fo scaa dty skianyn vees my chemmyrk derrey vees y tranlaase shoh er n’gholl shagh-ym.

² Nee’m geam gys y Jee smoo ard: dy jarroo gys y Jee nee yn chooish t’aym ayns laue y chooilleeney.

³ Ver eh cooney hym veih niau: as sauee eh mee veih’n scammylt echeysyn baillish mee y stroie.

⁴ Ver Jee magh e vyghin as e ynrickys: ta m’annym mastey lionyn.

⁵ As ta mee my lhie dy jarroo mastey cloan gheiney, ta soit er aile: nyn veeacklyn t’ad shleiyghyn as sideyn, as nyn jengey ny chliwe gyere.

⁶ Soie oo hene seose, O Yee, erskyn ny niaughyn: as dty ghloyr erskyn ooilley’n seihll.

⁷ T’ad er hoiaghey lieen son my chassyn, as er hionney sheese m’annym: t’ad er chleiy jeeg roym as ad-hene er duittym ayns y vean echey.

⁸ Ta my chree soit er, O Yee, ta my chree soit er: goym arrane, as ver-ym moylley.

⁹ Dooisht seose, my ghloyr; dooisht lute as chlaasagh: dooisht-yms mee-hene feer voghey.

¹⁰ Ver-ym booise dhyt’s, O Hiarn mastey’n pobble: as goym arrane hood’s mastey ny ashoonyn;

¹¹ Son ta mooadys dty vyghin roshtyn gys ny niaughyn: as dt’irriney gys ny bodjallyn.

¹² Soie oo hene seose, O Yee, erskyn ny niaughyn: as dty ghloyr erskyn ooilley yn seihll.