Psalmyn 56 - Yn Vible Casherick 1775 1819

PSAL. LVI

¹ Bee myghinagh dooys, O Yee, son ta dooinney shirrey dy my stroie: t’eh gagh laa caggey as dy my heaghney.

² Ta my noidyn gagh laa goaill ayns laue dy my lhuggey seose: son t’adsyn ymmodee ta caggey m’oï, O uss smoo syrjey.

³ Ny-yeih, ga dy vel aggle orrym ny cheayrtyn: foast ta mee coyrt my hreishteil aynyd’s.

⁴ Ver-yms moylley da Jee son e ghoo: ta mee er choyrt my hreishteil ayns Jee, as cha goym aggle cre oddys dooinney y yannoo rhym.

⁵ T’ad gagh laa goaill my ghoan marran: ooilley ny t’ad smooinaghtyn er te dy yannoo olk dou.

⁶ T’ad ooilley lhiantyn ry-cheilley, as freayll ad-hene dy follit: as cur tastey da my chesmadyn, tra t’ad lhie farkiaght son m’annym.

⁷ Jed ad gyn kerraghey son nyn olkys: nee uss, O Yee, ayns dty yymmoose ad y hilgey sheese.

⁸ T’ou freayll coontey jeh my imman veih boayl dy boayl; cur my yheïr ayns dty voteil: nagh vel ny reddyn shoh scruit ayns dty lioar?

⁹ Cre-erbee yn traa ta mee geamagh ort, eisht bee my noidyn eebrit ersooyl: shoh ta fys aym er; son ta Jee er my heu.

¹⁰ Ayns goo Yee goym boggey: ayns goo yn Chiarn nee’m mee hene y gherjaghey.

¹¹ Dy jarroo ayns Jee ta mee er choyrt my hreishteil: cha goym aggle cre oddys dooinney y yannoo rhym.

¹² Dhyt’s, O Yee, eeck-ym my vreearraghyn: dhyt’s ver-ym booise.

¹³ Son t’ou er livrey m’annym veih baase, as my chassyn veih tuittym: dy voddym gimmeeaght kiongoyrt rish Jee ayns soilshey yn sleih bio.