Psalmyn 54 - Yn Vible Casherick 1775 1819

PSAL. LIV

¹ Saue mee, O Yee, er graih dt’ennym: as gow my phaart ayns dty niart.

² Cur clashtyn da my phadjer, O Yee: as eaisht rish goan my veeal.

³ Son ta joarreeyn er n’irree seose m’oï: as ta tranlaasee nagh vel Jee oc roish nyn sooillyn shirrey lurg my vioys.

⁴ Cur-my-ner, she Jee m’er-coonee: ta’n Chiarn mâroosyn ta cummal seose m’annym.

⁵ Cooilleenee eshyn olk da my noidyn: jean adsyn y stroie ayns dty ynrickys.

⁶ Oural dy chree arryltagh ver-ym dhyt, as dt’ennym y voylley, O Hiarn: son dy vel eh cha gerjoilagh.

⁷ Son t’eh er my livrey ass ooilley my heaghyn: as ta my hooill er vakin e yeearree er my noidyn.