Psalmyn 53 - Yn Vible Casherick 1775 1819

PSAL. LIII

¹ Ta’n peccagh ommijagh er ghra ayns e chree: Cha vel Jee erbee ayn.

² T’adsyn er jeet dy ve feer vee-chrauee, as dwoaiagh ayns yn olkys oc: cha vel unnane erbee ta jannoo dy mie.

³ Yeeagh Jee neose veih niau er cloan gheiney: dy akin row veg jeu yinnagh toiggal, as shirrey lurg Jee.

⁴ Agh t’ad ooilley er gholl ass y raad, t’ad ooilley-cooidjagh er jeet dy ve feohdoil: cha vel unnane myrgeddin ta jannoo dy mie, cha vel eer unnane.

⁵ Nagh vel adsyn fegooish tushtey ta gobbraghey olkys: gee seose my phobble myr ee-agh ad arran? cha vel ad er n’eamagh er Jee.

⁶ V’ad agglit raad nagh row oyr aggle: son ta Jee er vrishey ny craueyn echeysyn ren soiaghey ort; t’ou er choyrt ad gys nearey, son dy vel Jee er hoiaghey beg jeu.

⁷ Oh, dy jinnagh Jee saualtys da Israel magh ass Sion: Oh, dy jinnagh y Chiarn e phobble y livrey magh ass cappeeys!

⁸ Eisht yinnagh Jacob boggey ’ghoaill: as veagh Israel feer yennal.