Psalmyn 52 - Yn Vible Casherick 1775 1819

PSAL. LII

¹ Cre hon t’ou boggyssagh jeed hene, uss hranlaasagh: dy vod oo olk y yannoo;

² Fakin dy vel mieys Yee: farraghtyn foast gagh laa?

³ Ta dty hengey soit er olkys: as lesh breagyn t’ou giarey goll-rish skynn ghyere.

⁴ T’ou er ve ny s’graihee er neu-chairys na er mieys: as dy haggloo jeh breagyn ny smoo na jeh cairys.

⁵ Va taitnys ayd dy loayrt dy chooilley ockle oddagh assee y yannoo: O uss hengey oalsey.

⁶ Shen-y-fa nee Jee oo y stroie er son dy bragh: nee eh dty ghoaill, as dty hayrn ass dty chummal, as nee eh oo y astyrt magh ass cheer y sleih bio.

⁷ Hee yn sleih cairal shoh myrgeddin, as gowee ad aggle: as nee ad craidey mysh as gearey;

⁸ Jeeagh shoh’n dooinney nagh ghow Jee son e niart: agh hug e varrant gys e verchys vooar, as ren eh-hene y niartaghey ayns e olkys.

⁹ Er my hon’s, ta mee myr billey-olive glass ayns thie Yee: ta my hreishteil ayns myghin meiygh Yee son dy bragh as dy bragh.

¹⁰ Ver-yms booise dhyt dy kinjagh son shen ny t’ou er n’yannoo: as nee’m treishteil ayns dty ennym, son shynney lesh dty nooghyn eh dy mie.