Psalmyn 50 - Yn Vible Casherick 1775 1819

PSAL. L

¹ Ta’n Chiarn, dy jarroo yn Jee smoo niartal, er loayrt: as er choyrt eam da’n seihll veih irree seose ny greïney gys y gholl sheese echey.

² Magh ass Sion ta Jee er hoilshaghey eh-hene: ayns aalid firrinagh.

³ Hig y Jee ain, as cha bee eh ny host: hed aile roishyn nee toyrt-mow, as bee dorrin niartal er ny ghoostey seose mygeayrt-y-mysh.

⁴ Nee eh geamagh er ny niaughyn veih’n yrjid: as er y theihll, dy vod eh briwnys e phobble.

⁵ Chaggle-jee my nooghyn cooidjagh hym’s: ad shen ta er n’yannoo conaant rhym lesh oural;

⁶ As nee ny niaughyn fockley magh e chairys: son Jee hene yn Briw.

⁷ Clasht, O my phobble, as neem’s loayrt: neem’s mee hene feanish y ymmyrkey dt’oï, O Israel; son mish Jee, dy jarroo yn Jee ayd’s.

⁸ Cha der-yms oghsan dhyt son dty ourallyn, ny son dty hebballyn-losht: son nagh row ad kinjagh kiongoyrt rhym.

⁹ Cha jean-ym soiagh jeh dow erbee ass dty hie: ny goayr-yrryn ass dty woaillee.

¹⁰ Son lhiam’s ta ooilley maase ny keilley: as myrgeddin ta’n ollagh er thousane cronk.

¹¹ Shione dou ooilley ny eeanlee t’er ny sleityn: as ta maase feïe yn vagher ayns my hilley.

¹² My ta mee accryssagh, cha n’insh-ym dhyt’s: son ta’n slane seihll lhiam’s, as ooilley ny t’ayn.

¹³ Vel oo smooinaghtyn dy n’ee-ym feill teirroo: as dy n’iu-ym fuill goair?

¹⁴ Cheb yn oural dy hoyrt-booise gys Jee: as eeck dty vreearraghyn dasyn smoo Ard;

¹⁵ As eïe orrym’s ayns traa dy heaghyn: myr shen neem’s geaishtagh rhyt, as nee oo mish y voylley.

¹⁶ Agh rish ny mee-chrauee dooyrt Jee: Cre hon t’ou preacheil my leighyn, as goaill my chonaant ayns dty veeal;

¹⁷ Fakin dy vel dwoaie ayd er lhiasaghey-bea: as t’ou er hilgey my ghoan cheu dty chooylloo.

¹⁸ Tra honnick oo maarliagh, va dt’aigney lesh: as t’ou er ghoaill ayrn mâroosyn ta brishey poosey.

¹⁹ T’ou er choyrt reamys da dty veeal dy loayrt olkys: as lesh dty hengey t’ou er hoiaghey magh molteyraght.

²⁰ Hoie oo, as loayr oo noi dty vraar; dy jarroo, as t’ou er choyrt scammylt da mac dty vayrey.

²¹ Ny reddyn shoh t’ou er n’yannoo, as chum mish my hengey; as heill oo dy olkyssagh dy row mish eer dty lheid hene: agh ver-yms oghsan dhyt, as soie-ym kiongoyrt rhyt ny reddyn t’ou er n’yannoo.

²² O smooinee-jee er shoh, shiuish ta jarrood Jee: er-aggle dy raip-ym shiu ersooyl, as nagh bee unnane erbee dy livrey shiu.

²³ Quoi-erbee ta chebbal dou booise as moylley, t’eh cur onnor dou: as dasyn, ta reill e ymmyrkey dy cair, soilshee-yms saualtys Yee.