Psalmyn 5 - Yn Vible Casherick 1775 1819

PSAL. V.

¹ Cur geill da my ghoan, O Hiarn: gow tastey jeh smooinaghtyn dowin my chree.

² O eaisht rish coraa my eam, my Ree, as my Yee: son hood’s nee’m my phadjer.

³ My choraa clynnee uss dy leah, O Hiarn: dy moghey neem’s my phadjer y hebbal hood’s, as jeeaghyn seose.

⁴ Son she uss y Jee nagh vel veg y taitnys ayd ayns mee-chraueeaght: chamoo nee olk erbee baghey mayrt.

⁵ Cha jean nyn lheid as ta ommijagh shassoo ayns dty enish: son ta dwoaie ayd orroosyn ooilley ta jannoo mee-chairys.

⁶ Nee uss adsyn y stroie ta loayrt breagyn: ver y Chiarn feoh chammah da’n dooinney folley as da’n er molteyragh.

⁷ Agh er my hon’s, hig-ym gys dty hie, er eer ymmodee dty vyghin: as ayns dty aggle ver-yms ooashley kiongoyrt rish dty hiamble casherick.

⁸ Leeid mee, O Hiarn, ayns dty chairys, kyndagh rish my noidyn: jean dty raad rea roish m’eddin.

⁹ Son cha vel veg y firrinys ayns e veeal: ta ny ayrnyn cheu-sthie oc eer olkys.

¹⁰ Ta’n scoarnagh oc oaie foshlit: t’ad brynneraght lesh nyn jengey.

¹¹ Stroie uss adsyn, O Yee; lhig daue cherraghtyn liorish nyn goyrleyn hene: tilg ad magh ayns ymmodee nyn mee-chraueeaght; son t’ad er n’irree-magh dt’oï.

¹² As lhig dauesyn ooilley ta coyrt nyn dreishteil aynyd’s, boggey ’ghoaill: bee adsyn dy kinjagh coyrt booise, son dy vel oo fendeil ad; adsyn ta graihagh er dt’Ennym, vees lane dy voggey aynyd’s.

¹³ Son ver uss, Hiarn, dty vannaght da’n fer-cairal: as lesh dty chenjallys foayroil nee oo eshyn y endeil myr lesh eïlley-caggee.