Psalmyn 45 - Yn Vible Casherick 1775 1819

PSAL. XLV

¹ Ta my chree smooinaghtyn dy dowin er cooish vie: ta mee goaill lesh bingys ny arraneyn ta mee er n’yannoo mychione y ree.

² Ta my hengey myr fedjag-screeuee: yn scrudeyr tappee.

³ T’ou ny s’aalin na cloan gheiney: lane dy ghrayse ta dty veillyn, er-y-fa dy vel Jee er dty vannaghey son dy bragh.

⁴ Kiangle dty chliwe gys dty lheayst, O uss smoo niartal: cordail rish dty ooashley as dty ghloyr.

⁵ Aïgh mie dy row lhiat lesh dty ooashley: markee er dty hoshiaght, er coontey yn goo dy firrinys, dy veenid, as dy chairys; as nee dty laue yesh reddyn atchimagh y ynsaghey dhyt.

⁶ Ta dty hideyn feer virragh, as bee’n pobble er nyn injillaghey hood’s: hed dty hideyn trooid cree noidyn y ree.

⁷ Ta dty stoyl, O Yee, farraghtyn son dy bragh: ta lorg-reill dty reeriaght lorg-reill chairagh.

⁸ T’ou er choyrt graih da cairys, as feoh da mee-chairys: shen-y-fa ta Jee, dy jarroo yn Jee ayd’s, er dt’ooilaghey lesh yn ooil dy yennallys erskyn dty heshaghyn.

⁹ Ta ooilley dty gharmadyn soaral jeh myrrh, aloes, as cassia: magh ass ny plaaseyn ivory, lhieu t’ad er dty yannoo gennal.

¹⁰ Va inneenyn reeaghyn mastey dty vraane ooasle: er dty laue yesh hass y ven-reïn ayns coamrey dy airh, obbrit mygeayrt lesh caghlaaghyn daah.

¹¹ Clasht, O inneen, as smooinee ort, croym dty chleaysh: jarrood myrgeddin dty phobble hene, as thie dty ayrey.

¹² Myr shen bee taitnys ec y ree ayns dty aalid: son eshyn y Chiarn dty Yee, as cur uss ooashley da.

¹³ As bee inneen Tyre ayns shen lesh gioot: myr nee ny berchee myrgeddin mast’ yn pobble nyn aghinyn y yannoo kiongoyrt rhyt.

¹⁴ Ta inneen y ree ooilley gloyroil er cheu-sthie: ta’n coamrey eck dy airh obbrit.

¹⁵ Bee ee er ny choyrt lh’ee gys y ree ayns garmad dy obbyr-snaidey: hig ny moidynyn ta fieau urree ayns dty enish ta e sheshaghyn, as bee ad er nyn jebbal hood’s.

¹⁶ Lesh boggey as gennallys hig ad mâree: as hed ad stiagh ayns plaase y ree.

¹⁷ Ayns ynnyd dt’ayraghyn bee ayd cloan: ad oddys oo y yannoo princeyn ayns dy chooilley heer.

¹⁸ Cooin-yms er dt’ennym veih sheeloghe gys sheeloghe: shen-y-fa ver y pobble booise dhyt, seihll gyn jerrey.