Psalmyn 44 - Yn Vible Casherick 1775 1819

PSAL. XLIV

¹ Ta shin er chlashtyn lesh nyn gleayshyn, O Yee, ta nyn ayraghyn er n’insh dooin: cre ny obbraghyn ren uss ayns y traa ocsyn ’sy chenn earish;

² Kys t’ou er eiyrt magh ny ashoonyn-quaagh lesh dty laue, as er hoiaghey adsyn stiagh ’syn ynnyd oc: kys t’ou er stroie ny ashoonyn, as er n’eebyrt ad ersooyl.

³ Son cha dooar ad y cheer ayns nyn gummal liorish y chliwe oc hene: chamoo she’n roih oc hene ren cooney lhieu.

⁴ Agh dty laue yesh, as dty roih, as soilshey dt’eddin: son dy row aigney-mie ayd daue.

⁵ Uss my ree, O Yee: cur cooney gys Jacob.

⁶ Dty hrooid’s ver mayd nyn noidyn fo-chosh: as ayns dty ennym nee mayd stampey sheese adsyn ta girree seose nyn ’oï.

⁷ Son cha der-ym my varrant gys my vhow: cha nee my chliwe choonys lhiam.

⁸ Agh uss eh ta sauail shin veih nyn noidyn: as ta cur adsyn bun-ry-skyn ta dwoaie oc orrin.

⁹ Ta shin boggyssagh ayns Jee fey-ny-laa: as ver mayd moylley da dt’ennym son dy bragh.

¹⁰ Agh nish t’ou foddey jeh, as coyrt shin gys nearey: as cha vel oo goll magh marish nyn sheshaghtyn-caggee.

¹¹ T’ou coyrt orrin chyndaa nyn gooyl er nyn naboonyn: myr shen dy vel adsyn ta dwoaie oc orrin spooilley nyn gooid.

¹² T’ou lhiggey dooin v’er nyn ee seose myr kirree: as er skeayley shin fud ny ashoonyn.

¹³ T’ou creck dty phobble son veg: as cha vel oo goaill veg yn argid er nyn son.

¹⁴ T’ou coyrt orrin ve er nyn naaraghey liorish nyn noidyn: as dy ve son gannidys, as ayns faghid lioroosyn ta mygeayrt-y-mooin.

¹⁵ T’ou coyrt orrin dy ve an-ghoo mastey ny ashoonyn: as dy vel y pobble craa nyn ghing orrin.

¹⁶ Ta my stayd hreih gagh laa kiongoyrt rhym: as ta nearey m’eddin er my choodaghey.

¹⁷ Kyndagh rish goan yn fer-lunagh as y mollaghtagh: kyndagh rish y noid as yn eulyssagh.

¹⁸ As ga dy vel ooilley shoh er jeet orrin, ny-yeih cha vel shin dy dty yarrood: ny gymmyrkey shin hene dy frourtagh ayns dty chonaant.

¹⁹ Cha vel nyn gree er choyrt cooyl rhyt: chamoo ta ny kesmadyn ain er gholl ass dty raad;

²⁰ Cha vel, ga dy vel oo er woalley shin ayns ynnyd ny dragonyn: as er choodaghey shin lesh scadoo yn vaaish.

²¹ My ta shin er yarrood ennym y Jee ain, as er chummal seose nyn laueyn gys Jee erbee joarree: nagh jean Jee eh y ronsaghey magh? son ta fys echey er eer folliaghtyn y chree.

²² Er y ghraih ayd’s neesht ta shin er nyn gerraghey fey-ny-laa: as coontit myr kirree ta pointit dy v’er nyn stroie.

²³ Seose, Hiarn, cre’n-fa t’ou cadley: dooisht, as ny fuirree voïn er son dy bragh.

²⁴ Cre’n-oyr t’ou follaghey dt’eddin: as jarrood nyn dreihys as seaghyn?

²⁵ Son ta’n annym ain er ny chur lesh dy injil, dy jarroo gys y joan: ta’n bolg ain lhiantyn gys y thalloo.

²⁶ Irree as cooin lhien: as livrey shin er graih dty vyghinyn.