Psalmyn 41 - Yn Vible Casherick 1775 1819

PSAL. XLI

¹ Bannit t’eshyn ta smooinaghtyn er y voght as yn ymmyrchagh: nee’n Chiarn eshyn y livrey ayns traa e heaghyn.

² Dy jean y Chiarn eshyn y choadey as y reayll bio, dy vod eh ve bannit er y thalloo: as ny livrey uss eh gys aigney e noidyn.

³ Dy jean y Chiarn eh y gherjaghey tra t’eh ny lhie dy ching er e lhiabbee: jean uss ooilley e lhiabbee ayns e hingys.

⁴ Dooyrt mee, Hiarn, bee myghinagh dou: slaanee m’annym, son ta mee er n’yannoo peccah dt’oï.

⁵ Ta my noidyn loayrt dy olk jee’m: Cuin yiow eh baase, as cuin nee e ennym cherraghtyn?

⁶ As my t’eh cheet dy my yeeaghyn, t’eh loayrt dy foalsey: as ta e chree giennaghtyn molteyrys cheu-sthie jeh; as tra t’eh goll roish t’eh dy insh eh.

⁷ Ta ooilley my noidyn sansheraght cooidjagh m’oï: dy jarroo m’oï t’ad smooinaghtyn er yn olk shoh.

⁸ Lhig da briwnys baaish cheet magh n’oï: as nish dy vel eh ny lhie, ny lhig da girree seose arragh.

⁹ Dy jarroo, my charrey ainjyssagh hene, er hug mee my hreisht: eshyn neesht ren gee jeh m’arran, t’eh dy mooar farkiaght dy follit er my hon.

¹⁰ Agh bee uss myghinagh dou, O Hiarn: jean uss my hroggal seose reesht, as nee’m ad y chooilleeney.

¹¹ Liorish shoh ta fys aym dy vel oo foayroil dou: nagh vel my noid geddyn barriaght m’oï.

¹² As tra ta mee ec my lhaynt, t’ou dy my chummal seose: as nee oo m’y hoiaghey kiongoyrt rish dt’eddin er son dy bragh.

¹³ Bannit dy row yn Chiarn Jee dy Israel: seihll gyn jerrey. Amen.