Psalmyn 40 - Yn Vible Casherick 1775 1819

PSAL. XL

¹ Ren mee farkiaght dy surransagh er y Chiarn: as deaisht eh rhym, as cheayll eh my eam.

² Hug eh lesh mee neesht magh ass y lhag atchimagh, magh ass y laagh as y chray: as hoie eh my chassyn er y chreg, as ren eh my immeeaght y oardrail.

³ As t’eh er choyrt arrane noa ayns my veeal: dy jarroo, toyrt-booise gys y Jee ain.

⁴ Nee ymmodee fakin shoh, as aggle y ghoaill: as ver ad nyn dreishteil ayns y Chiarn.

⁵ Bannit ta’n dooinney ta er hoiaghey e hreishteil ayns y Chiarn: as nagh vel er hyndaa gys y vooinjer voyrnagh, as gys nyn lheid as ta goll mygeayrt lesh breagyn.

⁶ O Hiarn my Yee, s’mooar ta ny obbraghyn yindyssagh t’ou uss er n’yannoo, myr ta neesht dty smooinaghtyn hooinyn: as foast cha vel y dooinney shen oddys yn earroo oc y hoiaghey royd dy kiart.

⁷ Dy jinnin’s goaill orrym dy hoilshaghey ad, as dy loayrt jeu: veagh ad ny smoo na ta mee fondagh dy hoiaghey magh.

⁸ Toyrtys-casherick as bee-oural cha bailt’s: agh my chleayshyn t’ou er vosley.

⁹ Chebballyn-losht, as oural son peccah cha vel oo er hirrey: eisht dooyrt mish, Jeeagh, ta mee cheet.

¹⁰ Ayns corp y lioar te er ny scrieu jeem’s, dy lhisin’s dt’aigney ’chooilleeney, O my Yee: ta mee booiagh y yannoo eh; dy jarroo ta’n leigh ayd’s er cheu-sthie dy my chree.

¹¹ Ta mee er hoilshaghey dty chairys ayns y chaglym mooar: cur-my-ner, cha gum-ym my veillyn, O Hiarn, as shen ta fys ayd er.

¹² Cha vel mee er cheiltyn dty chairys cheu-sthie jeh my chree: ta my haggloo er ny ve jeh dty ynrickys, as jeh dty haualtys.

¹³ Cha vel mee er vreayll ergooyl dty vyghin as firrinys: veih’n chaglym mooar.

¹⁴ Ny tayrn dty vyghin ersooyl voym, O Hiarn: lhig da dty chenjallys-ghraihagh as dty irriney dy kinjagh mish y choadey.

¹⁵ Son ta seaghyn erskyn-earroo er jeet mygeayrt-y-moom; ta my pheccaghyn er ghoaill lheid y ghreme orrym, nagh vel mee abyl jeeaghyn seose: s’feer eh, t’ad ny smoo ayns earroo na renaigyn my ching, as ta my chree dy m’ailleil.

¹⁶ O Hiarn, lhig da ve dty aigney dy my livrey: jean siyr, O Hiarn, dy chooney lhiam.

¹⁷ Lhig dauesyn ve er nyn goyrt gys nearey, as er nyn gastey cooidjagh, ta shirrey lurg m’annym dy stroie eh: lhig daue v’er nyn imman gour nyn drommey dy scammyltagh, ta wooishal olk dou.

¹⁸ Lhig daue ve treigit, as er nyn gooilleeney lesh nearey: ta gra rhym, Fie ort, fie ort.

¹⁹ Lhig dauesyn ooilley ta dy dty hirrey, ve gennal as boggoil aynyd’s: as lhig dauesyn ta graihagh er dty haualtys, dy kinjagh gra, Dy row moylley gys y Chiarn.

²⁰ Er my hon’s, ta mee boght as ymmyrchagh: agh ta’n Chiarn kiarail er my hon.

²¹ Uss my er-coonee as my er-kionnee: ny lhig shaghey foddey, O my Yee.