Psalmyn 39 - Yn Vible Casherick 1775 1819

PSAL. XXXIX

¹ Dooyrt mee, Goym tastey jeh my raaidyn: nagh jean-ym peccah lesh my hengey.

² Smaght-ym my veeal myr lesh streean: choud as ta’n vee-chrauee ayns my hilley.

³ Chum mee my hengey, as cha loayr mee veg: va mee my host, dy jarroo veih goan mie; agh va shoh pian as trimshey dou.

⁴ Va my chree cheh er cheu-sthie jee’m; as choud va mee myr shoh ayns smooinaghtyn dowin, ren yn aile greesaghey: as ec y jerrey loayr mee lesh my hengey.

⁵ Hiarn, cur toiggal dou jeh my yerrey, as earroo my laghyn: dy vod fys ve aym cre cha giare ta my vea.

⁶ Cur-my-ner, t’ou uss er n’yannoo my laghyn myr lhiurid reaish: as cha vel my eash agh myr red gyn veg dy ve soylit hood’s; as dy firrinagh ta dy chooilley ghooinney bio ooilley-cooidjagh fardail.

⁷ Son ta dooinney gimmeeaght ayns scadoo fardalagh, as dy voirey eh-hene ayns fardail: t’eh stoyral seose berchys, as cha vel fys echey quoi yiow soylley jeu.

⁸ As nish, Hiarn, cre ta my hreishteil? ta my hreishteil dy jarroo aynyd’s.

⁹ Livrey mee veih ooilley my loghtyn: as ny lhig dou ’ve son craid da’n vooinjer vee-chrauee.

¹⁰ Va mee my host, as cha doshil mee my veeal: son dty yannoo’s ve.

¹¹ Scugh dty cherraghey voym: ta mee dy jarroo ceaut fo errey hrome dty laue.

¹² Tra t’ou uss ayns dty chorree smaghtaghey dooinney son peccah, t’ou coyrt er yn aalid echey goll mow, myr dy beagh eh garmad eeit lesh lhemeen: cha vel dy chooilley ghooinney er-y-fa shen agh fardail.

¹³ Eaisht rish my phadjer, O Hiarn, as lesh dty chleayshyn cur geill da my accan: ny bee uss dty host ec my yheïr;

¹⁴ Son ta mish my yoarree mayrt’s, as my hroailtagh: myr va ooilley m’ayraghyn.

¹⁵ O ymmyrk lhiam son tammylt beg, dy voddym my niart y gheddyn reesht: roish my vaag-ym yn seihll shoh, as nagh bee’m arragh er my akin.