Psalmyn 35 - Yn Vible Casherick 1775 1819

PSAL. XXXV

¹ Gow my chooish ayns laue, O Hiarn, roosyn ta streeu rhym: as jean uss caggey noi ocsyn ta caggey m’oï.

² Cur dty laue gys y scape as yn eïlley-caggee: as shass seose dy chooney lhiam.

³ Tayrn magh y shleiy, as cur chyndaa dauesyn ta jannoo tranlaase orrym: abbyr rish m’annym, Mish dty haualtys.

⁴ Bee ad er nyn gastey, as er nyn goyrt gys nearey, ta shelg lurg m’annym: ver ad cooyl, as bee ad er nyn goyrt mow, ta kiarail olk m’oï.

⁵ Bee ad myr y joan roish y gheay: as ainle y Chiarn dyn skeayley ad.

⁶ Bee’n raad oc dorraghey as shliawin: as nee ainle y Chiarn ad y imman.

⁷ Son ren ad dy follit soiaghey nyn ribbey dy my stroie gyn oyr: dy jarroo fegooish oyr ren ad ooig son m’annym.

⁸ Hig toyrt-mow doaltattym ersyn gyn-yss, as nee’n ribbey t’eh er hoiaghey dy follit eh-hene y hayrtyn: dy vod eh tuittym ayns yn olkys echey hene.

⁹ As m’annym, bee gerjoilagh ayns y Chiarn: nee eh boggey ’ghoaill ayns e haualtys.

¹⁰ Nee ooilley my chraueyn gra, Hiarn, quoi ta casley rhyt’s, ta livrey yn boght veihsyn ta ro hrean da: dy jarroo yn boght, as eshyn ta ayns treihys, veihsyn ta dy spooilley eh?

¹¹ Dirree feanishyn foalsey seose: hug ad reddyn gys my lieh nagh row mee kyndagh jeu.

¹² Deeck ad dooys olk son mie: gys mee-gherjagh mooar m’annym.

¹³ Ny-yeih, tra v’adsyn ching, hug mee orrym aanrit-sack, as ren mee m’annym y injillaghey lesh trostey: as chyndaa-ee my phadjer gys m’oghrish hene.

¹⁴ Ren mee gymmyrkey mee hene myr gys my charrey, ny my vraar: hie mee dy trimshagh, myr fer ta dobberan son e voir.

¹⁵ Agh ayns my arkys ghow ad boggey as haggil ad cooidjagh: dy jarroo, haink ny eer ghonnanyn cooidjagh m’oï nagh bione dou, jannoo craid jee’m, as cha scuirr ad.

¹⁶ Marish ny brynnyree va grindeyryn connyssagh: ren snaggeraght orrym lesh nyn veeacklyn.

¹⁷ Hiarn, caïd yeeaghys oo er shoh: O livrey m’annym veih ny seaghyn t’ad cur lhieu orrym, as m’annym veih ny lionyn.

¹⁸ Myr shen ver-yms booise dhyt ayns y chaglym mooar dy leih: nee’m dty voylley mastey mooarane pobble.

¹⁹ O ny lhig dauesyn ta my noidyn boggyssagh harrym dy aggairagh: chamoo lhig daue meekey lesh nyn sooillyn ta dwoaie oc orrym gyn oyr.

²⁰ As cre’n-oyr? cha vel y ghlare oc son shee: agh t’ad soit er goan scammyltagh noi ocsyn ta sheeoil ayns y cheer.

²¹ Doshil ad nyn meeal orrym, as dooyrt ad: Gow nearey, gow nearey, honnick shin eh lesh nyn sooillyn.

²² Shoh t’ou er vakin, O Hiarn: ny bee dty host eisht, ny gow foddey voym, O Hiarn.

²³ Dooisht, as shass seose dy vriwnys my phlaiynt: jean cairys ayns my chooish, my Yee, as my Hiarn.

²⁴ Jean mish y vriwnys, O Hiarn my Yee, cordail rish dty chairys: as ny lhig daue boggyssagh harrym.

²⁵ Ny lhig daue gra ayns nyn greeaghyn, Shen, shen, shoh myr baillin eh: chamoo lhig daue gra, Ta shin er choyrt mow eh.

²⁶ Bee ad er nyn goyrt bun-ry-skyn as gys nearey cooidjagh ta goaill boggey jeh my heaghyn: bee ad er nyn goodaghey lesh oghsan as mee-ooashley ta boggyssagh m’oï.

²⁷ Lhig dauesyn ve gennal as goaill boggey ta er cheu my ghellal yeeragh: dy jarroo lhig daue dy kinjagh gra, Bannit dy row yn Chiarn, ta goaill taitnys ayns maynrys e harvaant.

²⁸ As er son my hengey’s, bee eh loayrt jeh dty chairys: as jeh dty voylley fey-ny-laa.