Psalmyn 32 - Yn Vible Casherick 1775 1819

PSAL. XXXII

¹ Bannit t’eshyn ta e neu-chairys er ny leih da: as e pheccah er ny choodaghey.

² Bannit yn dooinney nagh vel y Chiarn cur peccah erbee ny lieh: as ayns e chree nagh vel kialg erbee.

³ Son choud as chum mee my hengey: ren my chraueyn shymley ersooyl trooid my accan gagh-laa.

⁴ Son ta dty laue trome orrym laa as oie: as ta soo my chorp myr chyrmagh-loshtee yn tourey.

⁵ Goym rish my pheccah hood’s: as my neu-chairys cha vel mee er cheiltyn.

⁶ Dooyrt mee, Nee’m goaill-rish my pheccaghyn gys y Chiarn: as myr shen ren uss olkys my pheccah y leih dou.

⁷ Son shoh nee dagh dooinney ta crauee, jannoo e phadjer hood, ayns traa oddys oo v’er dty gheddyn: agh ayns ny thooillaghyn mooarey dy ushtey cha jig ad ny choair.

⁸ T’ou uss ynnyd dy m’ollaghey ayn, nee uss m’y choadey veih seaghyn: nee oo m’y chombaasal er dy chooilley heu lesh arraneyn-moyllee dy livrey-ys.

⁹ Ver-yms tushtey dhyt, as ynsee-ym dhyt yn raad t’ou dy ghoaill: as nee’m dty leeideil lesh my hooill.

¹⁰ Ny bee-jee shiuish goll-rish cabbyl ny mule, ta fegooish tushtey: yn beeal oc shegin y ve smaghtit lesh beealraghyn as streean, er-aggle dy roie ad ort.

¹¹ Ta kerraghey trome cour ny mee-chrauee: agh eshyn ta coyrt e varrant er y Chiarn, ta myghin lhiantyn huggey er dagh cheu.

¹² Bee-jee gennal, O shiuish sleih ynrick, as gow-jee boggey ayns y Chiarn: as bee-jee gerjoil, ooilley shiuish ta firrinagh ayns cree.