Psalmyn 31 - Yn Vible Casherick 1775 1819

PSAL. XXXI

¹ Aynyd’s, O Hiarn, ta mee er choyrt my hreishteil: ny lhig dou dy bragh v’er my choyrt gys nearey; livrey mee ayns dty chairys.

² Croym sheese dty chleaysh hym: jean siyr dy my livrey.

³ As bee uss my chreg lajer, as thie my endeilys: dy vod oo m’y hauail.

⁴ Son uss my chreg lajer, as my chashtal: bee uss neesht my leeideilagh, as cur mee er y raad er graih dt’Ennym.

⁵ Tayrn mee ass y ribbey t’ad er hoiaghey dy follit er my hon: son uss my niart.

⁶ Gys dty laueyn ta mee treishteil m’annym: son t’ou er my livrey, O Hiarn, uss Jee yn ynrickys.

⁷ Ta dwoaie er ve aym orroosyn ta geiyrt er ny cliaghtaghyn faase-chredjuagh [dy obbeeys]: as ta my hreishteil er ny ve ayns y Chiarn.

⁸ Bee’m gennal, as nee’m boggey ’ghoaill ayns dty vyghin: son t’ou er choyrt tastey da my heaghyn, as er chooinaghtyn er my annym ayns treihys.

⁹ Cha vel oo er my yeigh seose ayns laue my noid: agh er hoiaghey my chassyn ayns boayl dy reamys.

¹⁰ Jean myghin orrym, O Hiarn, son ta mee ayns seaghyn: as ta my hoilshey er n’aase moal lesh eer trimshey; dy jarroo my annym as my challin.

¹¹ Son ta my vea er n’aase shenn lesh trimshey: as my vleeantyn lesh dobberan.

¹² Ta my niart dy m’ailleil, kyndagh rish my vee-chraueeaght: as ta my chraueyn er choayl nyn mioyr.

¹³ Haink mee dy ve son oltooan mastey ooilley my noidyn, agh er-lheh mastey my naboonyn: as ren adsyn jeh m’ainjys roie er-chea voym, as adsyn honnick mee er y raad, ren ad m’y haghney.

¹⁴ Ta mee dy bollagh er my yarrood, myr dooinney marroo ass cooinaghtyn: ta mee coontit myr saagh brisht.

¹⁵ Ta mee er chlashtyn jeh cooyl-chassid y sleih: as ta aggle er dy chooilley heu, choud as t’ad cur nyn ghing cooidjagh, as goaill coyrle dy ghoaill ersooyl my vioys.

¹⁶ Agh ta my hreishteil er ny ve aynyd’s, O Hiarn: ta mish er ghra, She uss my Yee.

¹⁷ Ta my hraa ayns dty laue; livrey mee veih laue my noidyn: as vouesyn ta jannoo tranlaase orrym.

¹⁸ Jeeagh da dty harvaant soilshey dty eddin: as saue mee er graih dty vyghinyn.

¹⁹ Ny lhig dou tuittym giare jeh my hreishteil, O Hiarn, son ta mee er n’eamagh ort: lhig da ny mee-chrauee ve er nyn goyrt gys nearey, as er nyn goyrt nyn dhost ayns yn oaie.

²⁰ Lhig da ny meillyn breagagh ve er nyn goyrt nyn dhost: ta dy dewil, dy mooaralagh, as dy olkyssagh loayrt noi’n vooinjer chairagh.

²¹ O cre cha palchey ta dty vieys, t’ou er chiarail nyn gour ocsyn ta goaill aggle royd: as shen t’ou er n’yannoo aarloo dauesyn ta coyrt nyn dreishteil aynyd, dy jarroo kiongoyrt rish mec gheiney!

²² Nee oo ad y choadey ayns boayl follit dty enish veih brasnaghey dy chooilley ghooinney: nee oo ad y cheiltyn ayns dty chabbane veih argane chengaghyn.

²³ Dy row booise gys y Chiarn: son t’eh er yeeaghyn dooys kenjallys yindyssagh ayns ard-valley lajer.

²⁴ As tra va mee ayns my hiyr, dooyrt mee: Ta mish er my hilgey magh veih shilley dty hooillyn.

²⁵ Ny-yeih, hug oo clashtyn da coraa my phadjer: tra ren mee geamagh ort.

²⁶ O cur-jee graih da’n Chiarn, ooilley shiuish e nooghyn: son ta’n Chiarn coadey adsyn ta ynrick, as dy palchey cooilleeney eshyn ta gymmyrkey eh-hene dy mooaralagh.

²⁷ Bee-jee dunnal, as nee eshyn niartaghey nyn gree: shiuish ooilley ta coyrt nyn dreishteil ayns y Chiarn.