Psalmyn 25 - Yn Vible Casherick 1775 1819

PSAL. XXV

¹ Hood’s, O Hiarn, trog-ym seose m’annym; my Yee, ta mee er choyrt my hreishteil aynyd: O ny lhig dooys ’ve er my choyrt gys nearey, chamoo lhig da my noidyn ve boggyssagh harrym.

² Son cha bee veg jeusyn ooilley ny ta treishteil aynyd’s er nyn naaraghey: agh bee nyn lheid as ta girree-magh gyn oyr er nyn goyrt bun-ry-skyn.

³ Jeeagh dou dty raad, O Hiarn: as ynsee dou dty chassanyn.

⁴ Leeid mish ayns dt’irriney, as ynsee mee: son uss Jee my haualtys; aynyd va my hreishteil fey-ny-laa.

⁵ Tayrn gys cooinaghtyn, O Hiarn, dty vyghinyn meiygh: as dty chenjallys-ghraihagh, t’er ny ve er-dy-rieau.

⁶ O ny cooinee er peccaghyn as loghtyn my aegid: agh cordail rish dty vyghin smooinee orrym, O Hiarn, er graih dty vieys.

⁷ Graysoil as cairal ta’n Chiarn: shen-y-fa ynsee eh da peccee yn raad cair.

⁸ Adsyn ta imlee nee eh leeideil ayns briwnys: as dauesyn ta meen, ynsee eh e raad.

⁹ Ta ooilley raaidyn y Chiarn myghin as firrinys: da lheid as ta freaylley e chonaant as e leighyn.

¹⁰ Er graih dt’ennym, O Hiarn: bee myghinagh da my pheccah, son s’mooar te.

¹¹ Cre’n dooinney ta goaill aggle roish y Chiarn: eshyn nee eh leeideil ayns y raad lhisagh eh ’reih.

¹² Bee’n annym echey ec aash: as yiow e luight yn cheer ayns eiraght.

¹³ Ta folliaght y Chiarn nyn mast’ ocsyn ta goaill aggle roish: as nee eh soilshaghey daue e chonaant.

¹⁴ Ta my hooillyn dy bragh jeeaghyn gys y Chiarn: son tayrnee eh my chassyn ass y ribbey.

¹⁵ Chyndaa oo hene hym’s, as jean myghin orrym: son ta mee treigit as ayns treihys.

¹⁶ Ta trimshey my chree er ny vishaghey: O cur uss lhiat mee ass my heaghyn.

¹⁷ Jeeagh er my arkys as my hreihys: as leih dou ooilley my pheccah.

¹⁸ Jeeagh er my noidyn kys t’ad er nyn mishaghey: as t’ad gymmyrkey goanlys tranlaasagh m’oï.

¹⁹ O freill m’annym, as livrey mee: ny lhig dou v’er my choyrt gys nearey, son aynyd’s ta mee er choyrt my hreishteil.

²⁰ Lhig da ônid as dellal yeeragh goll mârym: son ta my hreishteil er ny ve aynyd’s.

²¹ Livrey Israel, O Yee: veih ooilley e heaghyn.